© Sputnik / Abzal Kaliev
Eńbek jáne halyqty áleýmettik qorǵaý ministri Svetlana Jaqypova arnaiy áleýmettik tólemderdi alýdyń negizgi shartyn jariialady, dep habarlaidy Sputnik Qazaqstan.
Prezident biylǵy joldaýynda ziiandy eńbek jaǵdailarynda jumys isteitin jáne 55 jasqa tolǵan adamdarǵa arnaiy tólemderdi taǵaiyndaý tártibin engizýdi tapsyrdy. Ministrdiń aitýynsha, jyl sońyna deiin tiisti zańdarǵa ózgeris engiziledi. Al 25 qazanǵa deiin qarjylandyrý kózderi aiqyndalady. 2024 – 2026 jyldarǵa arnalǵan respýblikalyq biýdjetke de túzetý engiziledi.
"Tólem alatyn adam 55 jasqa tolýy kerek. Budan bólek, jumys berýshiniń tarapynan biryńǵai zeinetaqy qoryna 7 jyl boiy jarnalaryn aýdaryp otyrýy tiis. Negizgi eki shart – osy", - dedi Jaqypova ortalyq kommýnikatsiialar qyzmetinde ótken brifingte.
Ministr osy talapty engizýdiń sebebin túsindirdi. Onyń aitýynsha, eńbek kitapshasynda "ziiandy eńbek jaǵdaiynda jumys istedi" dep jaza salýǵa bolady. Al naqty dálel joq.
"Sosyn kez kelgen mórdi qoiyp beredi. Siz barasyz da men 55-ke keldim, mine, shahtada istedim, maǵan aqsha tóleńiz dep aita alasyz. Biz ondaiǵa jol bermeý úshin eshqandai qaǵaz berýdiń qajeti dep otyrmyz. Aqparattyq júielerden ózimiz qarap, zeinetaqy jarnalaryn qarap, eńbek ótilińizdi sanap beremiz. Tólemdi de taǵaiyndaimyz. Taǵy aitaiyn, zeinetaqy jarnalarynyń merzimi 7 jyldan kem bolmaýy kerek", - dep atap kórsetti ministr.
