Aqtóbe oblysynyń prokýratýrasy Aqtóbe oblysy Yrǵyz aýdanynda avtobýstyń órtenýi saldarynan Ózbekstannyń 52 azamatynyń mert bolýyna bailanysty isti sotqa joldady, dep habarlaidy "Ult aqparat" QR Bas prokýratýrasynyń baspasóz qyzmetine silteme jasap.
Quzyrly organnyń habarlamasyna sáikes, atalǵan iste bes adam aiyptalýshy dep tanylǵan. Onyń úsheýi avtobýs júrgizýshisi, sondai-aq «Aziia tranzit servis» JShS-niń eki qyzmetkeri - quryltaishy men seriktestiktiń mehanigi. Atalǵan aiyptalýshylardyń mindeti - reiske shyǵar aldynda avtobýsty tekserý bolǵan.
«Kompaniia quryltaishysynyń áreketi kommertsiialyq uiymdarda mindetterine adal qaramaý (QK-niń 254-baby), eki jáne odan kóp adamnyń qaza bolýyna ákep soqqan jaramsyz avtokólik quralyn paidalanýǵa engizý, sondai-aq resmi qujatty qoldan jasaý, kórineý jalǵan qujatty paidalaný (QK-niń 385-babynyń 1 jáne 3-bólikteri) retinde saralandy», - delingen habarlamada.
Mehaniktiń áreketi eki jáne odan kóp adamnyń qaza bolýyna ákep soqqan jaramsyz avtokólik quralyn paidalanýǵa shyǵarý (QK-niń 348-babynyń 4-bóligi) retinde tanylyp otyr. Al avtobýs júrgizýshileriniń áreketi eki jáne odan kóp adamnyń qaza bolýyna ákep soqqan kólik quralyn paidalaný qaǵidalaryn buzý (QK-niń 345-babynyń 4-bóligi) jáne eki jáne odan kóp adamnyń abaisyzda qaza bolýyna ákep soqqan órt qaýipsizdigi qaǵidalaryn buzý (QK-niń 292-babynyń 3-bóligi) retinde saralanǵan.
«Sot avtobýs júrgizýshilerine qamaýda kúzetpen ustaý túrinde bultartpaý, seriktestiktiń basshysy men mehanikke qatysty kepil túrinde bultartpaý sharasyn tańdady. Avtobýs iesine kúzetpen qamaýda ustaý túrinde bultartpaý sharasy taǵaiyndala otyryp, halyqaralyq izdestirýge jariialandy», - dep habarlaidy Bas prokýratýranyń baspasóz qyzmetinen.
Eske sala ketsek, osy jyldyń qańtarynda Samara-Shymkent tasjolynda avtobýs órtenip, 52 adam qaza bolǵan edi. 18 qańtar kúni Astana ýaqytymen saǵat 10:30-da Yrǵyz aýdanynyń Qalybai aýylyna jaqyn mańda avtobýstan órt shyǵyp, onyń saldarynan 52 jolaýshy kóz jumǵan bolatyn.
