Biyl jazǵy kanikýl kezinde áleýmettik osal otbasylardan shyqqan 500 myńnan astam oqýshy saýyqtyrý demalysyna jiberiledi. Bul týraly QR Bilim jáne ǵylym ministrliginen málim etti, dep habarlaidy "Ult aqparat".
Vedomstvo aqparatyna sáikes, osy jazda 13 myń balalar lageri men demalys uiymdarynyń jumysyn uiymdastyrý josparlanǵan. Qarajat jergilikti atqarýshy organdardyń biýdjetinen bólinetin bolady. Epidemiologiialyq jaǵdai kúrdelenip ketpese, jazǵy demalysqa 1 millionnan astam oqýshy bara alady.
Jazǵy saýyqtyrý naýqany oqý jyly aiaqtalǵannan keiin birden bastalady. Bul rette balalar lagerlerin ashý jáne olardyń tolymdylyǵy týraly sheshimdi óńirlik sanitarlyq dárigerler qabyldaidy. Munyń bári óńirlerdegi epidemiologiialyq jaǵdaiǵa bailanysty.
«Sanitarlyq normalar qatań saqtalýy kerek. Óńirler tiisti jumys júrgizdi, saýyqtyrý lagerleri balalardy qabyldaýǵa daiyndalyp jatyr. Óńirdegi sanitarlyq-epidemiologiialyq jaǵdai eskeriletin bolady. Sanitarlyq dárigerlermen birge balalardyń qaýipsiz demalýy qamtamasyz etilýi kerek. Balalardyń quqyqtaryn qorǵaý komiteti bul máseleni baqylaýǵa alýǵa tiis», — dep tapsyrdy
Sonymen qatar jazǵy kezeńde olimpiadalyq rezervtegi jazǵy mektepter, til mektepteri, debat klýbtary jáne túrli damytý úiirmeleri jumys isteidi.
Qaýipsizdikti qamtamasyz etý maqsatynda jedel áreket etý úshin arnaiy jumys toby quryldy. Onyń quramyna bilim basqarmalary basshylarynyń orynbasarlary, múddeli memlekettik organdar men qoǵamdyq uiymdardyń ókilderi engen.
Respýblikanyń barlyq óńirinde «qaýipsiz attraktsion» reidtik sharalary ótkiziledi. Sonymen birge «Balaǵa laiyq» jobasy bastaldy. Máselen jazǵy ýaqytta balalardyń quqyqtaryn qorǵaý komitetiniń resmi paraqshalarynda balalar men olardyń ata-analary maquldaǵan dámhanalardyń, saiabaqtardyń, skverlerdiń jáne basqa da obektilerdiń fotosýretteri ornalastyrylatyn bolady.
«Sondai-aq QR Tótenshe jaǵdailar ministrligimen birlesip sýda jáne órt kezinde balalardyń qaýipsizdigin qamtamasyz etýdiń biryńǵai tásilderi ázirlendi. Ata-analarǵa qyraǵylyq tanytyp, balalardy úlkenderdiń qaraýynsyz sý qoimalaryna jibermeýge keńes beremiz», - dedi QR BǴM baspasóz qyzmetinen.
