Almaty qalasynda 50-ge jýyq mádeniet qyzmetkeri «Qazaqstannyń eńbek sińirgen qairatkeri» ataǵyn aldy, dep habarlaidy QazAqparat.
Bul týraly Mádeniet jáne sport ministri Dáýren Abaev áleýmettik jelidegi paraqshasynda málimdedi. Ol búgin ońtústikte «Ult rýhy – urpaq muraty» atty Qazaqstannyń I mádeniet forýmy ótkenin atap ótken. Elimizdiń barlyq óńirinen kelgen sala ókilderiniń, ziialy qaýymnyń basyn qosqan is-shara mádeniet pen óner tóńiregindegi kóptegen túitkildi máseleni ortaǵa saldy.
«Ózekti taqyryptardy batyl kóterip, bolashaq rýhani baǵyt-baǵdarymyzdy ashyq talqylaǵan spikerlerge erekshe alǵys aitamyn. Forým aiasynda Prezidentimizdiń Jarlyǵymen bekitilgen 50-ge jýyq áriptesimizge «Qazaqstannyń eńbek sińirgen qairatkeri» ataǵyn saltanatty túrde tabystadyq. Atalǵan marapat salaǵa bar sanaly ǵumyrlaryn arnaǵan naǵyz mádeniet maitalmandaryna berildi», - dep jazdy vedomstvo basshysy Dáýren Áskerbekuly.
Forým ary qarai ministrliktiń Almaty qalasy ákimdigimen birlesip uiymdastyrǵan ashyq aspan astyndaǵy tuńǵysh kitap jármeńkesimen jalǵasty.
