Elordada halyqty AÁK barynsha qamtý jáne AÁK taǵaiyndaý boiynsha sapaly tásildi qamtamasyz etý maqsatynda 2020 jyldyń 5 qańtarynan bastap azamattardy qabyldaý bastalady, dep habarlaidy qala ákimdiginiń resmi saity.
Ataýly áleýmettik kómek ótinish berilgen aiynan bastap, ótinish berilgen kúnine qaramastan taǵaiyndalady. Mysaly, qujat 20 qańtarda tapsyrylsa, tólem tolyq ai boiy tólenedi. Qujattar «Januia» otbasy institýtyn qoldaý ortalyǵynda, «Almaty», «Baiqońyr», «Esil», «Saryarqa» aýdandarynda qabyldanatyn bolady. Habarlasqan azamatqa, ótinish, jeke kýálikti usyný kerek.
Sondai-aq, AÁK-ti taǵaiyndaý úshin turǵylyqty jerińizde turaqty nemese keminde 6 ai ýaqytsha tirkelgen bolýy kerek. Halyqtyń áleýmettik osal toptaryna kómek kórsetýdiń jańa formatyna sáikes 2020 jyldyń 1 qańtarynan bastap kópbalaly otbasylarǵa ai saiynǵy memlekettik járdemaqy tóleý (kiristerdi esepteýsiz) qarastyrylǵan. Járdemaqy mólsheri: 4 balaǵa - 42 496 teńge; 5 bala - 53 127 teńge; 6 bala - 63 757 teńge; 7 jáne odan kóp balaǵa - 74 388 teńgeni quraityn bolady.
Qujattardy qabyldaý «Esil», «Saryarqa», «Baiqońyr» jáne «Almaty» aýdandarynyń Halyqqa qyzmet kórsetý ortalyqtarynda, sondai-aq «Januia» otbasyn qoldaý institýtynyń ortalyǵynda, «Almaty», «Baiqońyr», «Esil» jáne «Saryarqa» aýdandarynyń ákimdikterinde júrgiziledi. Jospar boiynsha 14 myńǵa jýyq adamdy qamtý qarastyrylyp otyr. Sondai-aq, AÁK alatyn az qamtylǵan otbasylarynan shyqqan balalardy kepildi áleýmettik paketpen qamtamasyz etý josparlanýda.
