Aldyn ala málimet boiynsha, Jańatasta páterdegi órt tez tutanǵysh materialdyń betine ashyq ot kóziniń túsýinen týyndaǵan. Bul týraly óńirlik kommýnikatsiialar qyzmetinde ótken baspasóz brifinginde oblystyq tótenshe jaǵdailar departamentiniń bastyǵy Ermek Mombaev aitty, - dep habarlaidy «Ult aqparat».
Ol órt-tehnika zerthanasynyń aldyn ala qorytyndysyn jariialady.
«Órt bes qabatty turǵyn úidiń úshinshi qabatyndaǵy úsh bólmeli páterde boldy. Ot balalar bólmesinde tutanǵan. Jalyn 16 sharshy metr aýmaqty qamtydy. Jyljymaly órt-tehnikalyq zerthana zertteý júrgizý kezde oqiǵa ornynda janǵan symdar men elektr jabdyqtary, pesh nemese basqa da qosymsha jylytý quraldary tabylmady. Úi ortalyq jylytýǵa qosylǵan», - dep atap ótti TJD basshysy.
Arnaiy komissiia tóraǵasy, Jambyl oblysy ákiminiń orynbasary Ulan Jazylbek zardap shekken otbasyna barlyq qajetti kómek kórsetiletinin atap ótti.
«Oqiǵanyń mán-jaiyn anyqtaý úshin oblys ákiminiń ókimimen komissiia quryldy, onyń quramyna jergilikti atqarýshy organdardyń, prokýratýranyń, politsiia departamentiniń, TJ departamentiniń jáne basqa da jaýapty memlekettik organdardyń ókilderi endi. Kesheden beri komissiia músheleri qaiǵyly oqiǵa ornyna baryp, jumys júrgizýde. Bizdiń tarapymyzdan barlyq qajetti kómek kórsetiledi, sonyń ishinde psihologiialyq kómekti jáne jerleý rásimin uiymdastyrýǵa qol ushyn beremiz», - dep Ulan Jazylbek zardap shekken otbasyna kóńil aitty.
Eske sala keteiik, keshe Jańatas qalasynda kópqabatty úiden órt shyǵyp, 5 bala kóz jumǵan bolatyn.
