Densaýlyq saqtaý júiesiniń barlyq áleýeti koronavirýs infektsiiasymen kúresýge baǵyttalǵan. Bul týraly depýtat Turǵyn Syzdykovtyń depýtattyq saýalyna orai QR Premer-Ministri Asqar Maminnyń bergen jaýabynda aitylǵan, dep habarlaidy "Ult aqparat".
«Epidemiiaǵa qarsy is-sharalarǵa 46 myńnan astam meditsina qyzmetkerleri tartyldy. Engizilgen qatań shekteý sharalarynyń arqasynda KVI boiynsha epidemiologiialyq jaǵdai turaqtandyryldy, meditsinalyq uiymdarǵa júkteme aitarlyqtai tómendedi. Qazirgi ýaqytta infektsiianyń táýliktik ósimi 0,07%-ǵa deiin tómendedi, naýqastardyń 95%-y saýyǵyp ketti, tósek-oryn júktemesi 12%-dy quraidy», - dep jazdy Asqar Mamin depýtattyq saýalǵa jaýabynda.
Onyń aitýynsha, Úkimet kúzgi-qysqy kezeńdegi epidemiologiialyq jaǵdaidy eskere otyryp, KVI tolqynyna qatysty keshendi sharalar qabyldaýda.
«Jyl sońyna deiingi jeke qorǵanys quraldarynyń qory quryldy, PTR testileý áleýeti táýligine 43 myńǵa deiin ulǵaityldy (qajet bolǵan jaǵdaida kúnine 60 myńǵa deiin ulǵaitylady). Biylǵy qazan aiynda 3100 oryndyq 15 modýldi juqpaly aýrýlar aýrýhanasy paidalanýǵa beriledi. Qajet bolǵan jaǵdaida statsionarlar qaita beiimdelip, infektsiialyq tósek-oryn sany 51 myńǵa deiin keńeiedi. Meditsinalyq kómekti ásirese aýyldarda qoljetimdi etý úshin qosymsha 100 jyljymaly meditsinalyq keshen, 53 rentgen-apparat, 2700 ókpeni jasandy jeldetý apparaty, 64 ottegi stantsiiasy satyp alynady, qarashaǵa deiin 807 jedel járdem avtomashinasy jetkiziledi», - deidi Asqar Mamin.
