Elordada 4,5 myńǵa jýyq qala turǵyny Pfizer vaktsinasymen (birinshi komponent) egildi, dep habarlaidy "Ult aqparat" qala ákimdiginiń resmi saityna silteme jasap.
Olardyń arasynda jasóspirimder (12-17 jas) kósh bastap tur – 2 877 bala ekpe alǵan. Negizinen, mamandar atap ótkendei, balalar mektepterdiń meditsinalyq pýnkterinde vaktsinatsiialanady.
«Ata-analar kóbinese pedagogterge mekteptiń medpýnktinde egilý nietimen ózderi júginedi. Olar bul jerde balalar úshin tanys orta, al ata-analar muǵalimdermen, medqyzmetkerlermen tanys bolǵandyqtan olardyń da kóńili jai. Biz ata-analar men balalardyń osyndai bastamasyna tek qýanyshtymyz. Olarǵa qolaily orta usynyp, áńgimelesemiz, olardyń jaǵdaiyn birge qadaǵalaimyz», - deidi «Salaýatty Astana» emhanasynyń mektep-mektepke deiingi bólimshesiniń meńgerýshisi Sáýle Eńsebaeva.
Sondai-aq, dárigerdiń aitýynsha, vaktsinatsiiadan keiin baqylaý aimaǵynda oqýshylarǵa qandaǵy qant deńgeiin ustap turý úshin shai, táttiler usynylady.
«Balalarǵa eń aldymen nazar aýdaryp, qamqorlyq tanytý qajet. Olar esh alańdamas úshin biz barynsha qolaily jaǵdai jasaýǵa tyrysamyz. Meniń oiymsha, balaǵa da, ata - anaǵa da osylai yńǵaily», - dep qosty dáriger.
Oqýshylardyń ata-analary da bul pikirmen kelisedi jáne meditsina qyzmetkerlerin qoldaidy.
«Mektep balalarǵa qalai qamqorlyq jasaitynyn, vaktsinatsiia protsesine óte muqiiat qaraitynyn baiqaimyz. Bárimiz de azdap alańdaimyz, biraq balalardyń densaýlyǵyna uqypty qaraǵandaryn kórip, bizdiń de kóńilimiz tynyshtaldy. Olarmen birge egý kabinetine kiremiz, birge otyramyz jáne 30 minýt kútemiz, eń bastysy - bári tynysh ótedi», - dep atap ótti joǵary synyp oqýshysynyń anasy Mairagúl Ajetova.
Búginde qala boiynsha 90 júkti áiel, 1 357 bala emizetin ana jáne 2 877 jasóspirim Pfizer vaktsinasyn aldy. Qala boiynsha birinshi komponentpen barlyǵy 466 myńnan astam adam vaktsinatsiialandy.
