Tótenshe jaǵdaidyń jariialanýyna bailanysty tabysynan aiyrylǵan 4,28 millionnan astam qazaqstandyq 42500 teńge kóleminde járdemaqy aldy, dep habarlaidy "Ult aqparat".
QR Eńbek jáne halyqty áleýmettik qorǵaý ministrliginen málim etkendei, 28 sáýirdegi jaǵdai boiynsha, Memlekettik áleýmettik saqtandyrý qorynan (MÁSQ) 4 mln 280 myńnan astam qazaqstandyqqa áleýmettik tólem taǵaiyndaldy. Onyń ishinde naýryz aiynda – 3 mln 732,5 myń, sáýir aiynda – 547,7 myń adam.
Búginge deiin 42 500 teńge mólsherindegi tólemdi alýǵa barlyǵy 8 mln 24 myń azamattan ótinish túsken.
Ótinishterdiń eń kóp sany Almaty oblysynan joldanǵan – 1 mln 45 myń. Keiingi oryndarda Túrkistan oblysy (999,7 myń ótinish), Almaty qalasy (896,6 myń), Nur-Sultan qalasy (594,6 myń), Shymkent qalasy (534,5 myń) tur.
Kelesi óńirlerdiń turǵyndaryna járdemaqy eń kóp taǵaiyndalǵan:
- Almaty oblysy – 624,2 myń;
- Túrkistan oblysy – 511,2 myń;
- Almaty qalasy – 413,2 myń.
«Kelip túsken 3 mln 658 myń ótinish boiynsha 42 500 teńge taǵaiyndaýdan bas tartyldy. Sebebi olar TJ kezinde tabysynan aiyrylýǵa bailanysty MÁSQ-dan áleýmettik tólemdi taǵaiyndaý qaǵidalaryna sai emestigi anyqtaldy», - dedi ministrlikten.
Bas tartýdyń negizgi sebepteri mynadai:
- ótinish berýshiniń jeke derekteriniń durys kórsetilmeýi;
- banktik shot nómiriniń durys kórsetilmeýi;
- ótinish berýshide turaqty jalaqysynyń bolýy (onyń ishinde memlekettik qyzmetkerler men biýdjettik uiymdardyń qyzmetkerleri);
- ótinish berýshiniń tótenshe jaǵdai engizilgenge deiin resmi jumys jasamaǵan zeinetaqy men járdemaqy alýshy bolyp tabylýy;
- ótinish berýshi úshin tótenshe jaǵdai rejimin engizgenge deiin sońǵy 12 ai ishinde mindetti áleýmettik aýdarymdardyń, zeinetaqy jarnalarynyń júrgizilmeýi, BJT tólemeý nemese beiresmi ózin-ózi jumyspen qamǵandardyń ótinish bergenge deiin BJT tólemeýi;
- ótinish berýshiniń qaitys bolýy nemese Qazaqstan Respýblikasynyń aýmaǵynan tys jerge turaqty turýǵa ketýi.
Áleýmettik tólem alýǵa ótinimdi eGov portaly, 42500.enbek.kz veb-saity jáne https://t.me/Help42500Bot adresi boiynsha Telegram-bot arqyly berýge bolady.
Ótinishtiń qaralý statýsyn 42500.enbek.kz saitynda tekserýge bolady.
Qosymsha qaraýdy talap etetin erekshe jaǵdailarda azamattar 42500@enbek.kz, 42500@gfss.kz elektrondyq mekenjailaryna jazbasha ótinish bere alady.
