Eńbek jáne halyqty áleýmettik qorǵaý ministri Birjan Nurymbetov Facebook-paraqshasynda 42 500 teńge áleýmettik tólemdi alý kezindegi jaýapkershilik týraly aitty, dep habarlaidy "Ult aqparat".
«Eńbek jáne halyqty áleýmettik qorǵaý ministrliginde azamattardy jaýapkershilikke tartatyndai quzyret joǵyn birden aitaiyn. Bizde memlekettik eńbek inspektsiiasy bar edi. Ony 2013 jyly ákimderdiń quzyryna berdi. Sol sebepti bireýdi jaýapqa, bolmasa qylmystyq jaýapkershilikke tarta almaimyz», - dedi ministr.
Vedomstvo basshysy 42 500 teńge áleýmettik tólem kimderge arnalǵanyn taǵy eske saldy.
«Tótenshe jaǵdai engizilgen ýaqyttan beri KIRISIN JOǴALTQAN AZAMATTARǴA áleýmettik tólemdi (42500 teńge) AILYQ EŃBEKAQYSY SAQTALMAITYN DEMALYSQA jiberilgen jaldamaly jumysshylar alýǵa quqyly ekenin aityp, túsindirip kelemiz. Alǵashqy kúnnen buiryqta da (Ereje) osylai jazyldy jáne ol ózgergen emes! Ókinishke qarai JUMYSYN ISTEP, AILYǴYN alyp júrgen jaldamaly jumysshylardyń kóbi (iaǵni olardy ailyǵy saqtalmaityn demalysqa eshkim jibermegen) 42 500 teńgege ótinim bergeni anyqtaldy. Erejege sáikes sizde bul tólemdi alý quqyǵy joq bolǵan! Maǵan keibireýler «onda nelikten sizder bizge tólem aýdardyńyzdar?» dep suraq qoiady. Sebebi ózińiz (nemese jumys berýshińiz) ótinimdi berip otyrsyzdar. Ol ótinimde jumys berýshi ailyǵyńyz saqtalmaityn demalysqa jibergenin, kiristen aiyrylǵanyńyzdy jazdyńyz», - dedi Birjan Nurymbetov.
Ministr ýáji bar azamattardyń taǵy biri «nelikten sizder ótinimdi qaraǵan kezde onyń bárin tekserip almadyńyzdar?» dep suraq joldaitynyn aitady.
«Biz ony teksere almadyq. Sebebi mynada: Erejeniń alǵashqy nusqasynda biz jumys berýshiden jumysshylardy ailyǵynyń saqtalýynsyz demalysqa jiberetini týraly buiryqtyń kóshirmesin nemese aqshanyń joqtyǵynan jumysshylarǵa ailyq tólei almaitynyn dáleldeitin basqa da bir qujatta joldaýdy talap ettik. Ekinshi kúni jumys berýshiler, jumysshylar, qoǵam ókilderi, kásipkerler palatasynyń ókilderi bul amaldyń tym biýrokratiialyq sipatqa ie ekenin, jumys berýshiler úshin egov arqyly skanerlengen qujatty bekitý qiynǵa soǵatynyn jetkizdi. Biz bul eskertpeni nazarǵa alyp, atalǵan talapty alyp tastadyq. Tek ótinim berýshi TJ-ǵa bailanysty kirisin joǵaltqanyn jáne keltirilgen málimetterdiń shynaiylyǵy úshin jaýapkershilik artatynyn RASTAITYN ÓTINIMDI qaldyrdyq. Iaǵni HABARLANDYRÝ qaǵidatyn qolai kórdik», - deidi ol.
B.Nurymbetov bul rette jumysshylardyń kóbiniń talap-tilegi (jumys berýshileri olar úshin ótinim berýge asyqpaǵan) eskerilgenin de aitady. Sebebi jumysshylarǵa eńbek etetin kompaniiasynyń BIN nómirin kórsete otyryp, ótinim berý múmkindigi berilgen.
«Qoǵam ókilderiniń bul rette eskertpesin tyńdap, durys istedik degen oidamyn. Osydan keiin sizdiń ailyq saqtalmaityn demalysqa shyǵatynyńyz týraly buiryqty qalai teksere alamyz? Múlde teksere almaimyz. Siz óz ótinimińizben málimettiń bárin berdińiz, biz ony qabyldadyq. Kóp adam «málimetter bazasy bolǵannan keiin bul ereje buzýshylyqtyń bárin tekserý kezinde anyqtaýlaryń kerek edi» deidi. Alaida bizdiń bazada sizdi ailyqsyz demalysqa jiberý týraly buiryq joq. Sebebi sizderdiń talaptaryńyz boiynsha mundai buiryqty tapsyrý erejesin alyp tastap, habarlandyrý sipatyna aýystyrdyq. Onyń ústine biz múlde shyqpaǵan buiryq qaidan bolsyn (siz demalysqa ketpei, jumysyńyzdy jalǵastyryp, ailyqty alyp júrsiz, iaǵni siz TJ kezinde tabysyńyzdy joǵaltpadyńyz)», - dep jazady ministr.
Osy sebepti vedomstvo basshysy «kim tólemdi taǵaiyndady – sol kináli» degen oimen kelispeitinin jetkizdi.
«Osy jazǵanymnyń bári TEK jumysyn istep júrip, ailyǵyn alyp júrip, 42 500 teńgeni alýǵa ótinim bergen adamdarǵa ǵana qatysty. Áitpese ereje boiynsha bul tólem negizinen ailyqsyz demalysqa jiberilgen jaldamaly jumysshylarǵa ǵana berilýi kerek edi. Osyǵan bailanysty 42 500 teńgeden aýdaryp otyrǵan Memlekettik áleýmettik saqtandyrý qory (MÁSQ) zańsyz berilip ketken tólemdi qaitarýdy talap etýge tolyq quqyly. Jalpy MÁSQ 42 500 teńgeden bólek múgedekterge, asyraýshysynan nemese jumysynan aiyrylǵandarǵa, júkti áielderge, bir jasqa deiingi balany tárbielep otyrǵandarǵa tólem aýdarady», - dep eske saldy Birjan Nurymbetov.
Birjan Nurymbetov sonymen qatar 42 500 teńge alǵan adamdarǵa qatysty qandai da bir TEKSERÝDI bastamaitynyn málim etti.
«Joǵaryda atalǵan jaldamaly jumysshylar men jumys berýshilerden basqa eshkimdi teksermeimiz. Sizdiń adal túrde ótinim berip, zańdy túrde aqsha alǵanyńyzǵa senimdimin. Ózińizdi jáne ózińizdiń jaqyndaryńyzdy saqtańyzdar», - dep túidi ministr.
