Búgingi tańda 3 mln 482 myń adamǵa TJ kezeńinde tabysynan aiyrylýyna bailanysty Memlekettik áleýmettik saqtandyrý qorynan áleýmettik tólem taǵaiyndaldy. Eńbek jáne halyqty áleýmettik qorǵaý ministrliginiń málimetine sáikes, «42 500 teńge» tólemge 6 mln 671 myń azamat ótinish berdi. Osy oraida Strategy2050.kz eldiń ár óńirinendegi tabysynan aiyrylyp, atalǵan qarjyny alǵan turǵyndardyń pikirimen bólisti, dep habarlaidy "Ult aqparat".
- Ainara Baijan, Nur-Sultan qalasynyń turǵyny:
- Men - eki balanyń anasymyn. Bir jyldan asty jeke kásipkerligim bar. Kásibim boiynsha salyq tólep turdym. Karantinge bailanysty kásibim ázirge toqtap tur. Sondyqtan da 42500 teńgelik áleýmettik tólemdi alýǵa ótinim berdim. Ol tólem maǵan taǵaiyndaldy. Qazirgi qiyn-qystaý kezeńde bul - aitarlyqtai kómek. Osyndai sharalardy júzege asyryp jatqan Úkimetke rizamyn.
- Raýana Tamshy, Almaty qalasynyń turǵyny:
- Men byltyr jazdan beri frilanser bolyp jumys istep júrgenmin. Ókinishke qarai, karantin bastalǵanda bizdiń de jumys toqtap qaldy. Biraq, osy ótken bir jyl ishinde 4 ai meniń zeinetaqy tólemderi júrip turdy. Sol sebepti 42500 teńgeni alýǵa 2651 teńge biryńǵai jiyntyqty ótep, ótinish jiberdim. Ótinim jibergen kúnniń ertesine áleýmettik tólem tústi. Qazir tabyssyz otyrǵannan keiin aldym. Jumysym toqtamasa, bul tólemdi muqtaj jandarǵa qaldyryp, ótinim bermeitin de edim.
- Ásel Hairýllina, Petropavl qalasynyń turǵyny:
- Tótenshe jaǵdaiǵa deiin men saýda ortalyǵynda satýshy bolyp jumys istedim. Alaida, karantinge bailanysty jumysymyz toqtap, meniń tabys kózim toqtady. Jalaqysyz qalǵannan keiin osydan birneshe kún buryn egov.kz saity arqyly memleket tarapynan berip jatqan 42 500 teńgege ótinim berdim jáne ol birneshe kúnnen keiin meniń esepshotyma tústi. Az da bolsa, kóp kómek demekshi, árine, bul qýantady. Biraq, karantin bitkennen keiin memleket tarapynan berilgen osy kómek qara halyqtan 2 ese qaitarylmasa eken degen niet bar. Jalpy, úlken rahmet.
- Gúlzada Bekmaǵambetova, BQO Qaratóbe aýdany Aqqozy aýylynyń turǵyny
- Buǵan deiin ákimdiktegi eńbek birjasynda tirkeýde turǵanmyn. Osydan birer kún buryn Aqqozy aýyldyq okrýgi ákimshiliginiń qyzmetkeri habarlasyp, tótenshe jaǵdaiǵa bailanysty memleket taǵaiyndaǵan 42 500 teńgeni alýǵa múmkindigim bar ekenin aitty. Telegram jelisindegi egov-tyń paraqshasyna tirkelip, ótinish berý kerektigin eskertken bolatyn. Alaida, men ony qoldana almaityndyǵymdy jetkizdim. Keiin ákimshilik qyzmetkeri ótinish berýime kómektesti, sóitip tólemaqyǵa ie boldym. Ákimshilik qyzmetkerlerine alǵysym sheksiz. Sondai-aq osyndai qiyn kezeńde azamattardy qarjylyq jaǵynan da qoldaý kórsetip otyrǵan úkimetke rizamyn. Men eki qyzdyń anasymyn. Ekeýi de mektepke barady. Myna áleýmettik tólemaqy otbasymyzǵa úlken kómek bolyp otyr. Bul qarajatty azyq-túlikke, taǵy basqa kerek-jaraǵymyzǵa jaratpaqpyz.
- Aqjarqyn Jetmekova, BQO Oral qalasynyń turǵyny
Men - dene shenyqtyrý pániniń muǵalimimin. Dekrettik demalysqa shyqqanǵa deiin Oral qalasyndaǵy №37 mektepte ustazdyq ettim. Keiin balaly bolyp, dekretke shyqtym. Bir jyl boiyna memlekettiń dekrette otyrǵan anaǵa taǵaiyndaǵan járdemaqysyn alyp keldim. Qazir ulym bir jastan asty. Negizi jumysqa shyqsam ba dep josparlaǵanmyn. Alaida, eldegi tótenshe jaǵdaiǵa bailanysty josparym iske aspai qaldy. Keiin áleýmettik tólem týraly estip, ótinish beretin jolyn izdestirdim. Alǵashynda egov saity men telegram bot durys jumys istemedi. Alaida úkimet telegram-botty ár aimaqtyń turǵyndaryna bólek ashqan. Bul jumysty tezdetti. Osylaisha, ótinish berdim, bir aptanyń ishinde esepshotyma 42 500 teńge tústi. Qiyn kezeńderde azamattarynyń jaǵdaiyn oilap, qarjylai járdem berip otyrǵan úkimetke alǵys aitamyn.
Nazerke Súiindik
