Áleýmettik jelilerde Daryn.online bilim berý platformasyn paidalanýshylardyń jeke derekteri taralyp ketkeni týraly aqparat tarady. Alaida kompaniia bul málimetterdiń shyndyqqa janaspaitynyn málimdedi, dep habarlaidy ult.kz.
Másele ThreatMon platformasynda jariialanǵan aqparattan keiin týyndaǵan. Onda belgisiz bireýler darknet-forýmdardyń birine Daryn.online platformasynyń 4,2 million paidalanýshysyna qatysty derekter bazasyn ornalastyrǵany aitylǵan.
Jariialanǵan aqparatqa sáikes, bazada oqýshylardyń, muǵalimderdiń jáne ákimshilik qyzmetkerlerdiń jeke málimetteri bolýy múmkin degen boljam jasalǵan. Atap aitqanda, paidalanýshylardyń aty-jóni, telefon nómirleri, elektrondyq poshta mekenjailary, JSN, jasy, jynysy, qupiiasóz heshteri, úlgerim týraly málimetteri jáne IP-mekenjailary kórsetilgen.
Bul aqparatqa qatysty Jasandy intellekt jáne tsifrlyq damý ministrliginiń Aqparattyq qaýipsizdik komiteti tekserý júrgizip jatqanyn habarlady.
«Qazirgi ýaqytta ministrliktiń Aqparattyq qaýipsizdik komiteti ashyq derekkózderde jariialanǵan aqparatty zerdelep jatyr. Tekserý nátijeleri qosymsha habarlanady», – dep málimdedi vedomstvo.
Al Daryn.online ókilderi derekterdiń taraýy týraly aqparattyń buǵan deiin de jariialanǵanyn jáne ol 2025 jyldyń jeltoqsanynda tekserilgenin aitty.
Kompaniia málimetinshe, memlekettik organdardyń qatysýymen júrgizilgen tekserý barysynda paidalanýshylardyń derbes derekteriniń jylystaý faktisi rastalmaǵan.
«Qazirgi ýaqytta taralyp jatqan aqparat buryn tekserilgen materialdarǵa negizdelgen jáne shyndyqqa janaspaidy», – dep habarlady platforma ókilderi.
Daryn.online — mektep oqýshylaryn UBT jáne basqa da emtihandarǵa daiyndaýǵa arnalǵan bilim berý platformasy. Joba 2019 jyly iske qosylǵan.
