Foto: egemen.kz
Tótenshe jaǵdailar ministri Syrym Sháriphanov Qutqarýshylar kúnine orai elordadaǵy «Qutqarýshylar saiabaǵynda» ornatylǵan memorialǵa gúl shoqtaryn qoiyp, qyzmettik boryshyn oryndaý kezinde erlikpen qaza tapqan áriptesterin bir minýt únsizdikpen eske alý is-sharasyna qatysty. Sonymen qatar qaza tapqan qyzmetkerlerdi eske alý rásimi barysynda azamattyq qorǵaý organdaryna jańadan kelgen 42 qyzmetker ant qabyldady, dep habarlaidy egemen.kz.
Sala merekesi qarsańynda uiymdastyrylǵan is-sharaǵa Tótenshe jaǵdailar ministrinen bólek, órt sóndirý kezinde qaza tapqan qutqarýshylardyń týystary, azamattyq qorǵaý organdarynyń ardagerleri jáne jiynǵa arnaiy shaqyrylǵan qonaqtar da qatysty.
Jiynda sóz alǵan S.Sháriphanov táýelsizdik alǵan kezden bastap búginge deiin qyzmettik mindetterin atqarý kezinde azamattyq qorǵaý organdarynyń 69 qyzmetkeri qaza tapqanyn, olardyń barlyǵy óz isine adal bolǵanyn atap ótti.
«Bul órt sóndirýshiler men qutqarýshylar – basqalardyń ómirin saqtap qalý úshin óz ómirin qaterge tigýge daiyn ekeniniń taǵy bir dáleli. Olar – zamanymyzdyń naǵyz batyrlary. Olardyń qyzmeti batyldyqty, adaldyqty jáne qurbandyqty qajet etedi. Óz ómirine qaýip tóndire otyryp, únemi tótenshe jaǵdailardyń ortasynda bolady, azamattarymyzdy qorǵaý úshin otpen jáne túrli apattarmen kúresedi. Osy saiabaqtaǵy eskertkish erlik pen janqiiarlyqtyń, batyrlyq pen isine adaldyqtyń materialdyq bailyqtan góri qundy ekenin eske salady. Qiyn sátterde adamdar birigip, múmkin emes nárseni jasai alatynyn bildiredi», - dedi Tótenshe jaǵdailar ministri.
Ardagerler keńesi tóraǵasynyń birinshi orynbasary, tarih ǵylymdarynyń doktory, professor Ómirzaq Ozǵanbaiuly jiynǵa qatysyp otyrǵan barsha qutqarýshy qyzmet salasyndaǵy áskerilerdi, jaýyngerlerdi kásibi merekelerimen quttyqtap, aldaǵy isterine sáttilik tiledi.
«Keshegi jaýynger joldastaryńyzdy eske alý is-sharasyn ótkizip jatqandaryńyz, qazaqtyń uly oishyly, Alash qairatkeri Halel Dosmuhameduly aitqandai, el úshin eńbek etken adamdardyń erligin umytpaý, eldiktiń aiqyn belgisi dep bilemin. Qanshama azamattarymyz jumys barysynda óz ómirin emes, ózge jannyń amandyǵyn oilap, qiyn sátte basyn báigege tigip, artyna óshpes iz qaldyryp ketti. Olardyń erligin eshqashan umytýǵa bolmaidy. Saiabaqtaǵy qolyna sábi ustaǵan batyr azamattyń eskertkishi siiaqty sizder de qanshama adamdardy qiyn sátte aman alyp qalyp júrsizder. Sondyqtan qutqarýshy qyzmeti elimiz úshin, Otanymyz úshin óte mańyzdy mamandyqtyń biri dep aita alamyn», - dedi Ó.Ozǵanbaiuly.
Resmi is-sharalardan keiin S.Sháriphanov azamattyq qorǵaý organdaryna jańadan kelgen 42 qyzmetkerdiń ant qabyldaý rásimine kýá boldy.
Elordadaǵy «Qutqarýshylar saiabaǵy» órt sóndirýshiler men qutqarýshylardyń, sondai-aq qyzmettik mindetterin oryndaý kezinde qaza tapqan qyzmetkerlerdiń qurmetine arnap osydan eki jyl buryn el Táýelsizdiginiń 30 jyldyǵyna orai salynǵan edi. Qutqarýshylar skveriniń ortalyǵynda órt sóndirýshi túrinde jasalǵan eskertkish bar, ol ózgeniń ómirin qutqarý úshin kún saiyn óz ómirin qaýipke tigetin batyrlarǵa alǵys retinde ornatylǵan. Sonymen qatar aýmaqta 1964 jyly shyǵarylǵan ATs-30 MAZ 205 raritetti arnaiy órt sóndirý mashinasy ornatylǵan.
