Qazaqstandyqtar 42 500 teńgeni ekinshi aida alý úshin Biryńǵai jiyntyq tólemin (BJT) taǵy tóleýi tiis pe? Bul suraqqa Eńbek jáne halyqty áleýmettik qorǵaý ministrliginiń baspasóz qyzmetinen jaýap berdi, dep habarlaidy "Ult aqparat".
«Buǵan deiin aitylǵanyndai, 42 500 teńgelik áleýmettik tólemdi ekinshi aida da alý úshin qaitadan ótinish berýdiń keregi joq. Sonymen qatar, tótenshe jaǵdai jariialanǵan kezde, iaǵni 42 500 teńgeni alar aldynda BJT-ny aýdardyńyz. 42 500 teńgeni ekinshi aida alý úshin BJT-ny taǵy aýdarýdyń qajeti joq», - dep málim etti vedomstvodan.
Sondai-aq ministrlik kelesi bir máselege nazar aýdartty.
«Ózin-ózi jumyspen qamtyp jatqan azamattar kirissiz qalǵanyn rastap, 42 500 teńge alý úshin BJT tóledi. Eger azamat ózin beiresmi jumyspen qamtýshy mártebesinde qala berse, Memlekettik kiris komiteti BJT-ny ári qarai tóleýdi talap etýi múmkin. Sebebi 42 500 teńgeni alǵan azamat belgili bir kásippen ainalysatynyn aiǵaqtap otyr. Áitse de, bul máseleni qadaǵalaý Eńbek jáne halyqty áleýmettik qorǵaý ministrliginiń quzyretine jatpaidy», - dedi vedomstvodan.
Sonymen qatar ministrliktiń baspasóz qyzmeti 42 500 teńge alǵan el turǵyndaryna ekinshi ai úshin tólem qashan jasalatynyn habarlady.
«Azamattar «áleýmettik tólem ekinshi aiǵa qashan túsedi?» dep jii suraq qoiyp jatyr. Bankterde másele týyndap qalmasa, bekitilgen ereje boiynsha, birinshi tólem 20 naýryz kúni túsken bolsa, onda ekinshi tólem týra bir aidan keiin, iaǵni 20 sáýir kúni beriledi», - dep málim etti ministrlikten.
