Tótenshe jaǵdai kezinde 42 500 teńge ala almaǵan azamattardyń bul áleýmettik tólemdi alýǵa áli de múmkindigi bar. Bul týraly QR Eńbek jáne halyqty áleýmettik qorǵaý vitse-ministri Aqmadi Sarbasov aitty, dep habarlaidy QazAqparat.
«Tótenshe jaǵdaidyń toqtatylýyna bailanysty 2020 jyldyń 11 mamyrynan bastap jańa ótinishterdi qabyldaý aiaqtaldy. Sonymen birge, «42 500 teńge» tólemi taǵaiyndalmaǵan jekelegen azamattardyń ótinishterine bailanysty Eńbek jáne halyqty áleýmettik qorǵaý ministrligi mundai tólemderdi taǵaiyndaýdyń is-qimyl syzbasyn ázirledi. Budan buryn bas tartý týraly sheshim qabyldanǵan «42 500 teńge» áleýmettik tólemin taǵaiyndaý ótinishterin qaita qaraý úshin, aýdandyq (qalalyq) shtabqa rastaityn qujattarmen birge tiisti ótinish berý kerek», - dedi Aqmádi Sarbasov Ortalyq kommýnikatsiialar qyzmetindegi brifingte.
Onyń atap ótýinshe, karantin engizilgen óńirlerde ShOB, iri kásipkerlik, kommertsiialyq emes zańdy tulǵalar jumysshylarynyń atynan ótinish bere alady. Bul rette ótinish tek áleýmettik tólem taǵaiyndaýdan bas tartý (ony toqtatý) týraly sheshim qabyldanǵan qyzmetkerler úshin beriledi. Áleýmettik tólem taǵaiyndaýdan bas tartý týraly sheshim qabyldanǵan jeke kásipkerler, jeke tájiribemen ainalysatyn adamdar, BJT tóleýshiler, azamattyq-quqyqtyq sipattaǵy sharttar boiynsha jumys isteitin adamdar óz attarynan beredi.
«Usynylǵan qujattardy qaraǵannan keiin aýdandyq (qalalyq) shtab «42 500 teńge» áleýmettik tólemin taǵaiyndaýǵa quqyǵynyń bary nemese joǵy týraly qorytyndy shyǵarady. Oń qorytyndy «Azamattarǵa arnalǵan úkimet» memlekettik korporatsiiasy bólimshesine beriledi. Ol «Ótinish berýshiniń elektrondyq is maketin» qalyptastyrady jáne derekterdi MÁSQ filialyna beredi. MÁSQ filialy áleýmettik tólem taǵaiyndaý nemese taǵaiyndaýdan bas tartý týraly sheshim qabyldaidy. Aýdandyq (qalalyq) shtabtyń qorytyndysymen nemese MÁSQ filialynyń sheshimimen kelispegen jaǵdaida, ótinish berýshi rastaityn qujattarymen aýdandyq (qalalyq) shtabtyń jumys organy arqyly oblystyq (qalalyq) shtabqa júginedi. Sodan keiin qaita qaraý protsedýrasy qaitalanady. Karantin talaptaryn eskere otyryp, adamdardyń jappai jinalýyna jol bermeý maqsatynda ótinishter 2020 jylǵy 1 jeltoqsanǵa deiin qaralatyn bolady», – dep túsindirdi vitse-ministr.
