Birde-bir adam 42 500 teńge alǵany úshin, tipti jibergen qateligi úshin qylmystyq jazaǵa tartylmaidy. Bul týraly Ortalyq kommýnikatsiialar qyzmetindegi brifingide QR Eńbek jáne halyqty áleýmettik qorǵaý ministri Birjan Nurymbetov aitty, - dep habarlaidy "Ult aqparat".
«Búgingi tańda tótenshe jaǵdailardyń saldaryna bailanysty tabysynan aiyrylǵan 3 mln 960 myń adamǵa áleýmettik tólem taǵaiyndaldy. Olarǵa 157 mlrd teńge tólendi. Ókinishke orai sońǵy 4-5 kún boiy áleýmettik jelilerde, qoǵamda «42 500 teńge alǵany úshin qylmystyq turǵyda jazalaidy eken» degen áńgime kóp taralyp jatyr. Biz bárin qarap shyqtyq. 5 sáýirden bastap zańgerlerimiz osy máselege qatysty pikirlerin aita bastaǵan. Onyń ishinde erekshe taralǵany sol kúni Zakon.kz portalynda orys tilinde Daniiar Nurlanuly men Rýslan Qojahmet esimdi zańger-advokattardyń Qylmystyq kodekstiń alaiaqtyqqa qatysty baptaryn taldap, sony 42 500 teńge tólemine qatystyryp jazǵan maqalasy boldy», - dedi ol.
Onyń atap ótýinshe, atalǵan maqalada ol azamattar «ministr Nurymbetovtiń eshkimdi jappai teksermeimiz degen sózin jumys berýshiler paidalanyp, jalǵan málimetter berýi múmkin» degenge keltirgen.
«Osyǵan bailanysty, qurmetti qazaqstandyqtar, aǵaiyndar! Birde-bir adam 42 500 teńge alǵany úshin, tipti jibergen qateligi úshin qylmystyq jazaǵa tartylmaidy. Oǵan negiz joq. Osyǵan núkte qoiaiyq. Eshkim jaýapkershilikke tartylmaidy. Ony ana talqylap jatqan zańgerler de biledi. Biz eshkimdi teksermeimiz. Sebebi bul - áleýmettik tólem. Bul - áleýmetke baǵyttalǵan tólem», - dedi ministr.
Birjan Nurymbetov halyqtyń basym bóliginiń tabysy az, jalaqy mólsheri tómen, zeinetaqy, járdemaqy kóp emes ekendigin basa aitty.
«Sondyqtan kópshilik osy tólemdi alǵysy keledi. Ótken brifingide de aitqanmyn, biz eshkimdi jappai tekserip jatpaimyz. Jeke tulǵalardy, resmi ne beiresmi bolsyn jumys istep júrgenderdi úilerdi aralap, teksermeimiz. Eshteńege ýaiymdamańyzdar. Sizderge tólendi me? Alyńyzdar, jaratyńyzdar. Tekserý bolsa da bizdi tekseredi», - dedi Eńbek ministri.
Qazaqstan Prezidenti Qasym-Jomart Toqaev 31 naýryzda telearna arqyly halyqqa úndeý joldap, koronavirýs pandemiiasyna bailanysty jariialanǵan tótenshe jaǵdaiǵa orai zeinetaqy men járdemaqyny 10 paiyzǵa indeksatsiialaýdy tapsyrǵanyn málimdegen. Sonymen qatar tótenshe jaǵdai kezinde kirisinen aiyrylǵan adamdarǵa eń tómengi jalaqy kóleminde – 42500 teńge (shamamen 95 dollar) tólenetinin aitqan.
