Eńbek jáne halyqty áleýmettik qorǵaý vitse-ministri Nariman Muqyshev 42 500 teńge tóleý barysynda nelikten irkilis bolatyndyǵyn túsindirdi, - dep habarlaidy "Ult aqparat".
«Ótinimniń kezeńderdiń birinde turyp qalýy máselesi tolyqtai sheshildi. Buǵan qatysty saýaldyń múldem az ekendigin kórip otyrmyn. Árbir jaǵdaidy qaita tekserip shyǵamyz», - dep jazdy vitse-ministr Instagram paraqshasynda.
Osy rette ol birneshe máselege jeke-jeke toqtaldy. Birinshisi - tólem taǵaiyndalǵanyna bir aptadan astam ýaqyt ótkenimen, qarajat kómek alýshynyń esepshotyna túspeýi.
«Buǵan deiin aitqanymdai, aqsha is júzinde bir kúnniń ishinde jiberiledi. Biraq, esepshot qate kórsetilgen jaittar bolyp turady. Kópshiligi: «men bárin durys kórsettim» deidi. Alaida aqsha jiberilgennen keiin bank keri qaitaryp jibergen nemese ózimiz baiqap qalǵan shamamen 930 myń ótinim esepshoty qate (20 simvoldan az jáne t.b.) kórsetilgen. Sonymen, nelikten irkilis oryn alady? Protsess kelesidei:
1) Biz aqshany sizdiń banktegi esepshotyńyzǵa (1 kún) aýdaramyz.
2) Bank tekserip, esepshot qate bolǵanda aqshany keri qaitarady (1 kún).
3) Biz ózimizdiń bazamyzdan aqshany aýdarý úshin ótinim berýshiniń basqa qoldanystaǵy esepshotyn izdeimiz. Máselen, siz basqa tólem alýyńyz múmkin. Muny sizdi barynsha mazalamaý úshin jasaimyz. Shamamen 900 myńyn taptyq (1 kún).
4) Eger tapsaq, aqshany qaita jiberemiz (1 kún). Keide adamdardyń basqa esepshotqa tústi deýiniń sebebi osynda. Aqsha joq dep aitpastan buryn barlyq esepshottaryńyzdy tekserip alýdy ótinemin.
5) Eger tappasaq, SMS jiberemiz (keshe mundai 28 myń SMS jiberdik). Oǵan jaýap retinde esepshot nómirin jiberý qajet (1 kún).
Munan ary sizdiń esepshotty qashan bergenińizge bailanysty. Ózderińiz kórip otyrǵandai, protsess bir kúnnen kóp ýaqytty alady. Biraq, bul tólem aýdarýda problema oryn alǵan jaittarda ǵana», - dedi ol.
Osy rette vitse-ministr kez kelgen qyzmettegidei bir nárse anyqtaý qajet bolsa, onda ol qosymsha ýaqytty alatyndyǵyn basa aitady.
«Búgingi kúni tólem jasaýǵa 4 197 336 ótinim qoiyldy. Onyń ishinde 4 126 155 azamatqa tólem jiberildi. Qalǵan 71 181 ótinish boiynsha azamattardyń esepshotyna qarajatty der ýaqytynda aýdarý maqsatynda jumys júrgizilip jatyr. Buǵan deiin tólengen tólemder boiynsha banktermen qosymsha tekserý júrgizilýde. Biz bul jaǵdaidy kúndelikti monitoringilep otyrmyz jáne qajet bolǵanda banktermen jáne protsesske jumyldyrylǵan ózge de uiymdarmen birden jumys isteimiz», - dedi Nariman Muqyshev.
