QR Eńbek jáne halyqty áleýmettik qorǵaý vitse-ministri Nariman Muqyshev 42 500 teńge áleýmettik tólemine qatysty eń kóp qoiylatyn saýaldarǵa jaýap berdi, - dep habarlaidy "Ult aqparat".
«Olardyń eń birinshisi - 1 jyldan 3 jylǵa deiin bala kútimine bailanysty demalysta otyrǵan áielder ótinim bere ala ma? Eger tabysy bolsa jáne tótenshe jaǵdaiǵa bailanysty ony joǵaltsa, onda iá. Biryńǵai jiyntyq tólem jasap, kelesi kúni ótinim berýi qajet. Ekinshisi - stýdentter ótinim bere ala ma? Eger stýdent tótenshe jaǵdaiǵa deiin jumys istep, TJ-ǵa bailanysty tabysynan aiyrylsa, áleýmettik/zeinetaqy tólemi/BJT-sy bolsa, onda ol ótinim bere alady», - dep atap ótedi vitse-ministr Instagram paraqshasynda.
Áleýmettik tólem tóleýden bas tartýlardyń negizgi sebebin suraýshylar da kóp.
«Birinshisi - bul JSN-i qate terilgen ótinimder. Mundai shamamen 160 myń ótinim bar. Ótinimdi qaita jiberýge keńes beriledi. Ekinshisi memlekettik organdardyń jáne memlekettik organdar basqaratyn mekemelerdiń qyzmetkerlerine bas tartyldy. Tótenshe jaǵdai kezinde memlekettik organdardyń qyzmeti toqtatylǵan joq. Olardyń qyzmetkerleri qashyqtan jumys isteý formatyna kóshti. Soǵan orai bul sanattaǵylar tótenshe jaǵdaiǵa bailanysty kirisinen aiyrylýy múmkin emes. Úshinshisi, biryńǵai jiyntyq aýdarymy joq kez kelgen sanattaǵy azamattarǵa bas tartylǵan sheshim boldy. Máselen, zeinetker nemese asa qajettiligi bar tulǵa tótenshe jaǵdaiǵa deiin jumys istese jáne onyń TJ engizilgen kúnge deiin BJT-sy ne áleýmettik tólemi bolsa, onda oǵan taǵaiyndalady. Eger zeinetker resmi jumys istep, aýdarymdary bolsa (bosatylǵan), onda oǵan jumys berýshisi ótinim berýi tiis. Bul TJ-ge deiin beiresmi jumys istep, TJ engizilgen kúnge deiin BJT tólegenderge qatysty», - dep túsindiredi N.Muqyshev.
Sonymen qatar vitse-ministr ótinim maquldanǵanymen aqshanyń túspeý sebebin de jan-jaqty tarqatyp berdi.
«Ózderińiz de bilesizder, osy saýaldardy alǵannan keiin taiaýda Telegram-kanalda qarajattyń uzaq aýdarylýyna qatysty saýalnama júrgizdim. Onyń nátijesinde bul máselelerge qatysty banktermen jumys istedik. Máselen, keibir bankterde shynymen de keshigýler bolǵany anyqtaldy. Biraq, olar qazirgi ýaqytta joiyldy. Naqty tsifrlarmen aitar bolsaq, onda búgingi kúni shamamen 930 myń ótinim berýshi esepshot nómirin kórsetpegen nemese IBAN jazý barysynda qatelikter jibergen. 800 myń ótinim boiynsha banktermen saraptama júrgizip, aqsha aýdarý tetikterin qarastyrdyq. Qalǵan 130 myńnyń IBAN-y tabylmady. Bul azamattardyń barlyǵynyń telefon nómirine esepshot nómirine suraý salynǵan SMS jiberiletin bolady. Oǵan esepshot nómirin durys kórsetip, jaýap berý qajet. Jiberer aldynda barynsha muqiiat bolýdy jáne qatalap tekserip alýdy ótinemin», - dedi vitse-ministr.
