Almaty politsiiasy tal túbinen es-tússiz jatqan jerinen tabylǵan 4-jastaǵy balanyń jaǵdaiyna qatysty túsinikteme berdi, dep habarlaidy QazAqparat tilshisi.
Almaty qalalyq Ishki ister departamentiniń baspasóz qyzmetiniń habarlaýynsha, Shyǵys ainalma jolyna jaqyn aimaqta bolǵan derekke qatysty sotqa deiingi tergeý jumystary bastaldy.
Qazir bul ispen Medeý aýdandyq IIB janyndaǵy politsiia bólimi ainalysyp jatyr.
«Keshendi jedel jáne tergeý sharalarynyń arqasynda júrgizýshiniń kim ekendigi, avtokólik markasy anyqtalady. Kúdikti tulǵa QR QK zańnamasyna orai jaýapqa tartylady», - dedi baspasóz qyzmetinen.
Aita ketý kerek, jantúrshigerlik oqiǵa keshe Almatydaǵy shyǵys ainalma jolyna jaqyn Brianskaia kóshesinde bolǵan. 4 jastaǵy balany kólik qaǵyp, qan josa bolǵan kúide kórpege orap, tal túbine qaldyryp ketken.
Ata-anasy birneshe minýt ótken soń ǵana balany júzdegen metr qashyqtan taýyp alǵan.
Al dárigerler búldirshinniń jaǵdaiyn óte aýyr dep baǵalap otyr. Qazir ul bala jansaqtaý bóliminde komada jatyr. Meditsina mamandary balanyń ómirin arashalap qalýǵa baryn salýda.
Al Almaty qalasy Máslihatynyń depýtaty, kásipker Qairat Qudaibergen balany qaqqandardy taýyp, jazalaýǵa baryn salýǵa ýáde berdi.
Bul týraly ol Feisbýktegi paraqshasynda jariialady.
«Men ákesine habarlastym. Qazir ol balasynyń amandyǵyn oilap, jansaqtaý bólimin qaraýyldap júr. Men óz kezegimde barynsha materialdyq kómek berýge ýáde berdim. Al dárigerler óz jumysyn 100 paiyzǵa atqaratynyna senemin. Men Máslihat depýtaty retinde kináli adamdy taýyp, zań boiynsha jazalaýǵa barymdy salýǵa ýáde beremin», - dedi ol.
Depýtat jol apatynyń kýágerleri bolsa, ózine tikelei jazýyn ótindi.
