Sýret: instagram.com/kris_p_talgar
Almaty oblysynyń prokýrorlary Almaty mańyndaǵy mektepte bolǵan 4-synyp oqýshysynyń isine qatysty sheneýnikter men pedagogterdi jazalaý týraly usynys engizdi, - dep habarlaidy Tengrinews.kz saity.
Oblystyq prokýratýra málimetinshe, Almaty irgesindegi mektepterdiń birinde synyptastarynyń qysymynan keiin 4-synyp oqýshysynyń óz-ózine qol jumsamaq bolǵanyna qadaǵalaý organynyń ókilderi dereý nazar aýdarǵan.
"11 qyrkúiekte Talǵar aýdandyq prokýratýrasy oblystyq bilim basqarmasyna zańbuzýshylyqtardy joiý týraly usynys engizdi. Sonymen qatar aýdandyq bilim bólimine, mektep ákimshiligine, synyp jetekshisi men psihologqa qatysty shara qabyldaý jáne isti aýdandyq kámeletke tolmaǵandar isi jónindegi komissiiaǵa joldaý týraly másele kóterildi", - deidi basqarma ókilderi.
Sondai-aq, prokýrorlar ýákiletti organdarmen birlesip, mekteptiń májilis zalynda quqyqbuzýshylyqtyń aldyn alý jáne eskertý maqsatynda dárister ótkizedi.
"Barlyq bilim berý uiymynda Almaty oblysy prokýratýrasynyń QR-kody bar, onyń kómegimen azamattar túrli quqyqbuzýshylyqtardyń barlyq deregi týraly habarlai alady, bul týraly dabyl dereý prokýrorlarǵa jiberiledi. Olar óz kezeginde qoldanystaǵy zańnamaǵa sáikes sharalar qabyldaidy", - dedi prokýrorlar.
Sonymen qatar Almaty oblysynyń Politsiia departamenti oqiǵanyń basqa da jai-japsaryn ashty.
"11 qyrkúiekte aýdandyq politsiiaǵa 1992 jyly týylǵan azamatsha aryzdanyp, 2013 jyly týǵan kámeletke tolmaǵan ulynyń dáriden ýlanǵany týraly aryzdanǵan. Tekserý barysynda bala úiinde otyryp, 10 shaqty tabletka ishkeni anyqtaldy. Aldyn ala málimet boiynsha, "Atsetilsalitsil qyshqyly" bolýy múmkin", - dedi Almaty oblysy politsiia departamentiniń basshysy Baýyrjan Álenov.
Eske salaiyq, Almaty irgesindegi aýyldardyń birinde 4-synyp oqýshysy basqa balalardyń qysymynan keiin óz-ózine qol jumsamaq bolǵan.
