Aqtóbe oblysyndaǵy «SQ-Farmatsiia» qoimasynda birqatar buzýshylyqtyń oryn alýyna, iaǵni dári-dármek qorynyń jetispeýine qatysty atalǵan uiym resmi túsinikteme berdi, dep habarlaidy QazAqparat.
«Qazirgi ýaqytta (22 qazan) Aqtóbe qalasyndaǵy «SQ-Farmatsiia» filialynyń qoimasyna Almaty men Shymkent qalasynan dári-dármek jetkizildi. Sanmen aitqanda, 186,4 mln teńgeni quraityn 53 ataýly dári-dármek. Odan ári dári-dármekter Batys Qazaqstan, Mańǵystaý jáne Atyraý oblystarynyń meditsinalyq uiymdaryna jetkiziledi. Iaǵni Aqtóbe habyndaǵy dári-dármekter qoimada turmaidy, qajetti óńirlerge birden jóneltiledi. Aqtóbege dári-dármekti jetkizý apta saiyn júzege asyrylýda. Jalpy, óńirlerge dári-dármek qory Nur-Sultan, Almaty jáne Shymkent sekildi iri qalalardan jetkiziledi«, - dedi «SQ-Farmatsiia» JShS-nyń baspasóz hatshysy Aisulý Mustafaeva tilshilerge bergen suhbatynda.
Eske sala ketsek, buǵan deiin QR Sybailas jemqorlyqqa qarsy is-qimyl agenttigi Aqtóbe oblysyndaǵy «SQ-Farmatsiia» qoimasynda birqatar buzýshylyqty anyqtaǵanyn habarlaǵan bolatynbyz.
Atap aitqanda, tekserý kezinde «SQ-Farmatsiia» virýsqa qarsy«Avifavir» preparatynyń satyp alynýyna qatysty naqty málimet bere almady. Onymen qosa, «SQ-Farmatsiia» JShS-niń filial ókili Nurlan Jubanyshev kóptegen dári-dármek aýrýhanalarǵa jetkizilip qoiǵanyn aitqanymen, sońǵy partiialar qaida jáne qandai mólsherde jetkizilgeni týraly suraqqa jaýap berýden qinalǵan.
Osydan keiin batystyń 4 óńiri – Aqtóbe, Batys Qazaqstan, Atyraý jáne Mańǵystaý oblystaryna qajetti eki ailyq dári qorynyń jasaqtalǵanynan qatysty kúmán týyndaǵan.
Budan bólek, monitoringilik top barǵan Aqtóbedegi 4 meditsinalyq uiymnyń qoimalarynda tiisti dári-dármekterdiń barlyq túri bolmai shyqqan.
