Shyǵys Qazaqstan oblysy Aiagóz qalasyndaǵy arnaiy áleýmettik kómek ortalyǵynda 4 balanyń ólimine qatysty vedomstvoaralyq komissiia otyrysy ótti, dep habarlaidy QazAqparat.
Zoom tuǵyrnamasynda onlain formatynda ótken otyrys barysynda Shyǵys Qazaqstan oblysy ákiminiń orynbasary Álisher Marhabat atalǵan oqiǵaǵa bailanysty Aiagózde komissiia otyrysy ótkendigin, bas pediatr men dárigerler toby ortalyqta tárbielenip jatqan 95 balany tekserip shyqqanyn atap ótti.
«Jalpy alǵanda, komissiia balalar belgili bir standartqa sai meditsinalyq-áleýmettik kólemdi tolyqtai alady degen pikirge keldi. Qazirgi ýaqytta komissiialyq tekserý jalǵasýda. Shyǵys Qazaqstan oblystyq taýarlar men kórsetiletin qyzmetterdiń sapasy men qaýipsizdigi departamenti de tekserýin jalǵastyryp jatyr. Meditsinalyq qujattardy júrgizý bóliginde zań buzýshylyqtar anyqtaldy. Olardyń protsessýaldyq normalaryna sáikes sál keiinirek jariia etiledi. Ózderińiz de bilesizder, ishki ister organy balalardyń ólimine qatysty fakti boiynsha QR QK 317-baby 4-bóligi boiynsha qylmystyq is qozǵady. Sotqa deiingi tergeý bastaldy. Jalpy, vedomstvoaralyq komissiia otyrysyndaǵy eskertýlerge bailanysty ortalyqta karantin sharalary aiqyndalǵan. Jańa pediatr balalarmen jeke jumys isteidi», - dedi ol.
Osy oraida komissiia otyrysyna tóraǵalyq etken Bilim jáne ǵylym ministri Ashat Aimaǵambetov 5 memlekettik organ atalǵan ortalyqta tekserý júrgizip jatqandyǵyn atap ótti. Sonymen qatar oǵan biraz ýaqyt ketetindigin de eskertti.
«Degenmen, tek Aiagózge ǵana qatysty emes júieli problemalardyń bar ekendigin qazirden-aq baiqap otyrmyz. Sońǵy ýaqyttaǵy rezonansty oqiǵalar munyń júieli sipatta ekendigin kórsetip otyr. Aiagózdegi balalar ortalyǵy jaiynda aitar bolsaq, 1 jylǵa jýyq ýaqyttyń ishinde mundai jaittar az bolmady. Ótken jyldyń tamyzynda qylmystyq is qozǵalǵanymen zań buzýshylyqtar anyqtalǵan joq dep tanyldy. Alaida rezonansty jaittar júieli máselelerdiń bar ekendigin bildiredi», - dedi Bilim ministri.
Esterińizge sala ketsek, osyǵan deiin Aiagózdegi áleýmettik kómek ortalyǵynda 4 balanyń qaitys bolǵandyǵy habarlandy.
QR Ishki ister ministrligi istiń tergelýin óz baqylaýyna aldy. Osy oqiǵadan keiin QR Eńbek jáne halyqty áleýmettik qorǵaý ministrligi elimizdiń ár óńirinde ornalasqan meditsinalyq-áleýmettik kómek kórsetetin 113 mekemege tekserý júrgiziletinin málim etti. Onyń ishinde Aiagózdegi balalarǵa arnalǵan arnaiy áleýmettik kómek ortalyǵy bar.
