Tuqym sharýashylyǵyn sýbsidiialaý kólemi 11,8 mlrd teńgeni quraidy. Bul týraly Úkimet otyrysynda Aýyl sharýashylyǵy ministri Saparhan Omarov málim etti, dep habarlaidy QazAqparat.
«Agroónerkásiptik keshen sýbektilerinen shamamen 350 myń tonna aýyl sharýashylyǵy ónimin forvardtyq satyp alý josparlanyp otyr», - dedi ministr Úkimet otyrysynda.
Budan bólek ol tyńaitqyshtar qoldaný kólemin 53 myń tonnaǵa ulǵaitý jáne olardyń qoldanylýyn ǵylymi negizdelgen qajettiliktiń 25,5 paiyzyna deiin jetkizý josparǵa engizilgenin aitty.
«Bul rette tuqym sharýashylyǵyn sýbsidiialaý kólemi 11,8 mlrd teńgeni quraidy, bul aýyl sharýashylyǵy taýaryn óndirýshiler úshin sapaly tuqymdardyń qoljetimdiligin arttyrýǵa múmkindik beredi. Kóktemgi dala jumystaryn júrgizý barysy erekshe baqylaýǵa alynatyn bolady», - dedi S. Omarov.
Aita keteiik, Qazaqstanda jalpy egis alańy 86,4 myń gektarǵa ulǵaiyp, 22,7 mln gektardy quraidy.
Maily, azyqtyq jáne kókónis-baqsha daqyldarynyń, sondai-aq qaraqumyq ári qant qyzylshasy siiaqty áleýmettik daqyldardyń alańdaryn ulǵaitý josparlanyp otyr. Sonymen qatar bidai, kúrish jáne maqta siiaqty dara daqyldar men ylǵaldy kóp qajet etetin daqyldar egiletin alqaptar qysqartylady.
