Shymkentte 23 jyl buryn asa iri mólsherde geroin tasymaldaýǵa qatysy bar er adamǵa sot úkimi shyqty, dep habarlaidy ult.kz.
Sot materialdaryna sáikes, 2003 jyly Shymkent turǵyny halyqaralyq uiymdasqan qylmystyq toptarmen bailanysta bolyp, esirtki zattaryn kóterme baǵamen shetelge ótkizýmen ainalysqan. Sol jyly ol top jetekshisinen asa iri mólsherde geroin jetkizý týraly tapsyrma alǵan.
Tapsyrmany oryndaý úshin qarasha aiynda sybailasymen birge Shymkentten Aqtóbege kólikpen jolǵa shyqqan. Alaida «Shymkent–Samara» tas jolynda kólikti politsiia toqtatqan.
Tintý kezinde janarmai quiýǵa arnalǵan orynnan untaq tárizdi zat salynǵan 35 paket tabylǵan. Saraptama olardyń jalpy salmaǵy 34 keliden asatyn geroin ekenin anyqtaǵan.
«Avtokólikti qarap-tekserý barysynda janarmai quiý ornynan untaq tárizdi zattar salynǵan 35 dana paket, iaǵni asa iri mólsherdegi salmaǵy 34 047,41 gramm "geroin" esirtki zaty tárkilenip alynǵan», – delingen sot úkiminde.
Alaida kúdikti sol kezde qashyp ketken. Ol tek 2024 jyly Reseide ustalyp, bir jyldan keiin Qazaqstanǵa ekstraditsiialanǵan.
Sotta er adamnyń kinási dáleldendi. Alaida ol taǵylǵan aiypty moiyndamai, aqtaý úkimin shyǵarýdy suraǵan.
Sot ony 13 jylǵa bas bostandyǵynan aiyrdy. Úkim zańdy kúshine endi.
