Foto: gov.kz
Ekologiia jáne tabiǵi resýrstar ministri Erlan Nysanbaev kiik sany qalai retteletinin aitty, dep habarlaidy Sputnik Qazaqstan.
Ministrdiń aitýynsha, kiik sanyn basqarý jónindegi biologiialyq negizdemede popýliatsiiany retteýdiń eki tásili usynylǵan. Birinshisi – tor qurý arqyly ustap, etin et óńdeitin zaýyttarǵa jetkizý. Bul ádis kúndiz jasalady. Ekinshisi – túnde atyp alý.
"Búginde biz tormen ustaý tásilin bastadyq. Biraq sońǵy eki aptada jańbyr kóp jaýyp, bul tásildi júzege asyrý qiyndyq týǵyzdy. Osydan keiin biz biologiialyq negizdemede kórsetilgen ekinshi tásildi qoldanýǵa sheshim qabyldadyq. Jalpy biologiialyq negizdeme boiynsha 337 myń bas kiik rettelýi qajet. Qazir tor arqyly 91 bas kiik ustalsa, ekinshi tásilmen bar-joǵy 14 bas kiik atyp alyndy", - dedi Nysanbaev ortalyq kommýnikatsiialar qyzmetinde ótken baspasóz máslihatynda.
Ministrdiń aitýynsha, biylǵy kóktemgi tóldi sanamaǵanda kiik sany 1 mln 950 myń basqa jetti.
"Jalpy kiik – ósimtal mal. Kelesi kóktemde sanaq ótedi, biraq biz qazir eń tómen boljammen alǵanda, mysaly 30 paiyzdy alǵannyń ózinde taǵy 600 myńnan astam kiik qosylyp otyr. Iaǵni búgingi kúni kiik sany 2 mln 600 myńnyń ústinde bolady", - deidi vedomstvo basshysy.
Nysanbaev "kiik burynnan ańshylyq jasaityn ańnyń túri" ekenin atap ótti.
"Biz buryn kiikti nege atqyzbai keldik? Nege kiik sanyn retteý máselesin qarastyrǵan joqpyz? Sebebi ol ýaqytta kiikterdiń sany óte tómen boldy. Al qazir olardyń sany tarihi kórsetkishten asyp ketti. Búginde kiikterden diqanshylarǵa 12 mlrd teńge zalal kelgenin bilesizder. Sol sebepti kiik sanyn retteý qajet", - dep túsindirdi ministr.
Ol tabiǵatta burynnan kele jatqan retteý tásili qazir jumys istemeitinin atap ótti.
"Mysaly buryn kiikti kim retteitin? Ony retteitin qasqyr, jut, aýrý bolatyn. Al qazir tabiǵatta ejelden kele jatqan mundai retteý tásilderi jumys istemeidi", - deidi Nysanbaev.
