Áleýmettik jelide ózin birneshe er adam zorlap, saldarynan júkti bolǵanyn málimdegen Natasha Qalymbetova Dana Nurjigitke suhbat berip, oqiǵanyń mán-jaiyn baiandady, dep habarlaidy ult.kz.
Onyń aitýynsha, bul jaǵdaidan keiin 32 jyl ótse de, sol kúnderdiń aýyr esteligi áli kúnge deiin janyn mazalaidy. Sondyqtan ol basynan ótken jaǵdaidy qoǵammen bólisýdi jón kórgen.
«32 jyl buryn týǵan aýylymda meni aiaýsyz qorlap, zorlaǵan tórt jigit týraly eki ai buryn paraqshama jazdym. Ishimde jatqan aýyr dertimdi elge aityp, pikir almasaiyn dedim. Múmkin tájiribeli psiholog nemese men sekildi jaǵdaidy bastan ótkergen jandar kezdesip, aqyl-keńesin berer dep oiladym», – dedi ol.
Natasha Qalymbetova qazirgi tańda Tailandta turatynyn aitty. Onyń sózinshe, kólik apatynan keiin kúizeliske túsip, ótkendegi aýyr oqiǵalar qaita esine túsken.
«Bir nársege renjissem, 32 jyl burynǵy jaǵdai oiyma oralady. Sol kúni kúizelispen jazdym, biraq birden jariialamadym. Keiin jariialaǵanymda, video bir kúnniń ishinde million qaralym jinady», – deidi ol.
Sondai-aq áiel adamnyń aitýynsha, áleýmettik jelidegi jazbadan keiin quqyq qorǵaý organdary ózimen bailanysqa shyqqan.
«Kelesi kúni Astanadan habarlasyp, is qozǵalǵanyn jáne elge kelýimdi surady. Artynsha Oraldan da qońyraý shalyp, qashan keletinimdi surady. Keiin Tailandtan bir aiǵa ruqsat alyp, Qazaqstanǵa keldim. Oralǵa kele sala aryz jazdym», – dedi Qalymbetova.
Ol osy ýaqytqa deiin mundai aýyr jaǵdai tek óziniń basynan ótken dep oilaǵanyn, alaida oqiǵasyn jariialaǵan soń kóptegen áielder ózderiniń de osyndai qiyndyqtarǵa tap bolǵanyn aityp habarlasqanyn jetkizdi.
Aita keteiik, qazirgi ýaqytta atalǵan oqiǵaǵa qatysty tiisti organdar tekserý jumystaryn júrgizip jatyr.
