Zeinetaqy jinaqtarynyń bir bóligin alý boiynsha 1,4 trln teńgege 313 myń ótinish maquldandy. Bul týraly halyqqa esep berý kezdesýinde QR Eńbek jáne halyqty áleýmettik qorǵaý ministri Serik Shápkenov aityp berdi, dep habarlaidy "Ult aqparat".
Ministrdiń aitýynsha, 2021 jyldyń basynda alǵash ret azamattarǵa zeinetaqy jinaqtaryn turǵyn úi jaǵdailaryn jaqsartýǵa, emdelýge aqy tóleýge nemese jeke kompaniialardyń basqarýyna berýge paidalaný múmkindigi berildi.
«Búginde zeinetaqy jinaqtarynyń bir bóligin alý quqyǵyn BJZQ-nyń 1 mln-ǵa jýyq salymshysy paidalana alady. 2021 jylǵy 4 maýsymdaǵy jaǵdai boiynsha 1,4 trln teńge somasyna birjolǵy zeinetaqy tólemderine 313 myń ótinish maquldandy», - dedi S. Shápkenov.
2020 jyly mindetti áleýmettik saqtandyrý júiesimen 6,3 mln jumys isteitin azamat qamtylǵan. 2020 jylǵy 1 qańtarda áleýmettik saqtandyrý júiesinde zeinetaqy júiesi sekildi eńbek ótili men áleýmettik tólemder mólsheriniń ózara bailanysy kúsheitildi.
«Nátijesinde áleýmettik qaterler týyndaǵanda áleýmettik tólemder mólsheri orta eseppen 50%-ǵa artty. Onyń ishinde eńbek etý qabiletinen airylý jaǵdaiyna tólemderdiń ósýi 69%-dy, asyraýshysynan airylý – 41% jáne jumysynan airylý – 44%-dy qurady», - dep tolyqtyrdy Serik Shápkenov.
