Jartylai orta salmaqtaǵy qazaqstandyq kásipqoi boksshy Daniiar Eleýsinov (5-0, 3 KO) Open Ring YouTube-jobasyna bergen suhbatynda aldaǵy josparlarymen bólisip, britandyq Djosh Kellimen bolatyn jekpe-jegi týraly aitty, dep habarlaidy «SPORTINFORM» SAA.
«Jańa jyldan keiin Amerikaǵa qaitamyn (AQSh). Kelesi aiqasqa daiyndalamyn. Jekpe-jekti Londonda ótkizýdi josparlap otyrmyz. Bul aiqasta 10 raýnd bolady. Taiaýda titýl úshin de aiqaspaqpyn», - dedi boksshy.
«Qazir menen myqty qarsylaspen aiqasýymdy talap etý durys emes dep oilaimyn. Tipti, Meivezer men Golovkin nólden bastady. Meniń qazirgi qarsylastarym olardyń alǵashqydaǵy qarsylastarynan da kúshti bolýy múmkin. Bul jyl men úshin jaqsy boldy dep esepteýge bolady. Kelesi jyly budan da kóp jekpe-jekter ótkizgim keledi. 30 jasqa deiin álem chempiony bolýdy qalaimyn», - dedi D.Eleýsinov.
Eleýsinov britandyq Djosh Kellimen básekelestik týraly da sóz qozǵady. Aita ketsek, eki boksshynyń da isterin promoýter Eddi Hern júrgizedi.
«Oǵan áli menimen aiqasqa túsýge erte. Muny kásibi bokstyń ne ekenin biletinderdiń barlyǵy túsinedi. Munyń bári bos sóz. Kelli ózine piar jasaǵysy keledi», - dedi ol.
Sondai-aq, qazaqstandyq onyń komnadasynyń jazda Qazaqstanda jekpe-jek ótkizýdi josparlap otyrǵanyn aitty.
