Jyl basynan beri jumysynan aiyrylýyna bailanysty Memlekettik áleýmettik saqtandyrý qorynan (MÁSQ) áleýmettik tólem alýshylardyń sany 30,5 myń adamdy qurady, bul rette aǵymdaǵy jylǵy sáýir aiynda 3,2 myń azamatqa járdemaqy taǵaiyndaldy, dep habarlaidy QR Eńbek jáne halyqty áleýmettik qorǵaý ministrliginiń baspasóz qyzmeti.
Qoldanystaǵy zańnamaǵa sáikes jumystan bosatylǵan qyzmetkerler mindetti áleýmettik saqtandyrý júiesine qatysý ótiline jáne sońǵy 24 aidaǵy tabysyna bailanysty 1 aidan 6 aiǵa deiin jumysynan airylýy boiynsha áleýmettik tólemder alady. Tólem joǵalǵan kiristiń 40%-yna deiingi mólsherinde MÁSQ qarajaty esebinen júzege asyrylady.
Tólem taǵaiyndaý úshin jumystan bosatylǵan qyzmetkerge:
- Egov.kz portalynda avtorizatsiialaný;
- «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaý;
- onlain qyzmetke tapsyrys berip, barlyq alańdardy toltyryńyz jáne oǵan ETsQ-men qol qoiyp, ótinimdi jiberińiz;
- bir kún ishinde sizdiń turǵylyqty jerińizdegi halyqty jumyspen qamtý ortalyǵy (budan ári – HJQO) sizge bos jumys oryndaryn usynady;
- eger jumys tabylmasa, 3 jumys kúni ishinde sizge qashyqtyqtan jumyssyz mártebesi beriletin bolady (qajet bolǵan jaǵdaida qosymsha aqparat jinaý úshin sizben HJQO qyzmetkeri habarlasady);
Jumyssyz retinde tirkelgeni týraly málimetter bolǵan kezde Eńbek ministrliginiń aqparattyq júiesi proaktivti formatta MÁSQ-tan tólemdi taǵaiyndaý boiynsha qyzmet kórsetýge kelisim berýge mobildik telefonǵa SMS-habarlama jiberedi. Kelisken jaǵdaida SMS-habarlamaǵa jaýap berý qajet. Tólem avtomatty túrde taǵaiyndalady.
Esterińizge sala keteiik, MÁSQ qarajaty esebinen jumysynan aiyrylǵan jaǵdaida tólenetin áleýmettik tólem jumystan shyǵý sebepterine qaramastan júzege asyrylady jáne jumyssyz adamdy ol jumys izdegen kezeńde qoldaýǵa arnalǵan.
