Foto: Evgenii Pavlenko, Kommersant
Energetika ministri Almasadam Sátqaliev Kókshetaý, Semei jáne Óskemen jylý elektr ortalyqtaryn salý úshin tańdaý nelikten Reseige túsip otyrǵanyn aitty, - dep habarlaidy Kazinform agenttigi.
«Ózara túsinistik týraly memorandýmǵa qol qoidyq. Qujat Qazaqstanda jylý elektr ortalyǵyn salýǵa ózara múddelikti bekitedi. Elektr energetikasy salasyn damytý josparyna sáikes, Kókshetaý, Semei jáne Óskemende JEO salý kózdelgen. Buǵan deiin ministrlik ashyq investitsiialyq tender negizinde atalǵan stansalardyń qurylysyna qatysty jumys júrgizgen edi. Tenderler ótken joq», - dedi ministr Aqordada BAQ ókilderine bergen suhbatynda.
Onyń aitýynsha, atalǵan nysandardy salýǵa niet tanytqan investorlar tabylmai otyr.
«Atalǵan JEO-lar kómirmen jáne gazben jumys isteýi tiis bolýyna bailanysty birshama másele bar. Bul rette ol kómirmen jumys isteitindikten halyqaralyq qarjy institýttary qarjylandyrýǵa daiyn emes. Shyǵaryndylarǵa, iaǵni qorshaǵan ortany qorǵaýǵa qatysty barynsha qatań talap qoidyq. Atalǵan konkýrstarǵa qatysýǵa, óz taraptarynan qarjymen qamtamasyz etýge daiyn elderdiń kóp bolmaýyna bailanysty osy memorandýmǵa qol qoidyq jáne resei tarapynyń Qazaqstanda iri JEO salý protsesine qatysýǵa múddeliligin bekittik. Biz qurylystyń bastan-aiaq salynǵanyna qyzǵýshylyq tanytamyz. Iaǵni, bas merdiger tek salyp qana qoimai, paidalanýǵa berý, iske qosý jáne retke keltirý jumystaryn qamtamasyz etýi qajet. Nátijesinde biz Qazaqstannyń ekologiialyq, tehnikalyq, eksplýataýiialyq standarttaryna sai jumys isteitin energetikalyq nysan alýymyz qajet. Qazir bastapqy satysy bolǵandyqtan ázirshe, somasyn aita almaimyn. Eger, jyldyń sońyna deiin úkimetaralyq kelisimge qol qoiatyn bolsaq, onda tyńǵylyqty jobalaýǵa kezeńine shamamen jarty jyl ketedi dep oilaimyn. Menińshe, kelesi jyly qurylys jumystaryna kirisetin shyǵarmyz», - dedi Almasadam Sátqaliev.
Osy oraida ministr JEO salý úshin nelikten tańdaý Reseige túskendigin túsindirdi.
«Biz birneshe márte konkýrs ótkizdik. Biraq, eshkim qyzyǵýshylyq tanytpady. Bul usynysty niettestik turǵysynan qarastyramyz. Kelissózder sátti aiaqtalǵan jaǵdaida dál osy reseilik merdigerlermen jobany júzege asyrýǵa kóshýge múmkindik bolady. Reseilik tarap usynysynyń basymdyǵy – bul qarjylandyrýǵa, úzdik tehnologiialardy usynýǵa daiyndyǵy. Munyń ústine reseilik áriptesterdiń Qazaqstannyń kúrdeli, kúli kóp kómirin jaǵýda biregei tájiribesi bar», - dedi ol.
