3 myńǵa jýyq qazaqstandyq jappai onlain bilimniń Coursera jetekshi alańyna qyzyǵýshylyq tanytyp, aqysyz onlain bilim alýǵa ótinish bildirdi. Osylaisha Eńbek jáne halyqty áleýmettik qorǵaý ministrligi men «Eńbek resýrstaryn damytý ortalyǵy» AQ ótinish qabyldaýdy jalǵastyryp jatyr, dep habarlaidy "Ult aqparat".
Coursera iri bilim platformasymen jasalǵan kelisim sheńberinde qazaqstandyqtar úshin aqysyz negizde 4,4 myńnan astam túrli kýrstar qoljetimdi. Sonymen birge resýrsta usynylatyn oryndar sany 50 myńmen shektelgen.
Baǵdarlamalaýǵa qyzyǵatyndar úshin Coursera Michigan ýniversitetindegi «Barlyǵyna arnalǵan baǵdarlamalaý (Python arqyly jumysty bastaý)» siiaqty ártúrli kýrstar usynady. Kýrs tanymal Python baǵdarlamalaý tilin qoldana otyryp, kompiýterlik baǵdarlamalaý negizderin úiretýge baǵyttalǵan.
Kýrstyń aldyn ala qoiatyn talaptary joq jáne kompiýterde ortasha tájiribesi bar kez kelgen adam kýrs materialdaryn meńgere alady.
Coursera málimetinshe, oqý aiasynda alynǵan bilim mansapqa jaǵymdy áser etedi. Máselen, kýrs túlekteriniń 39% baǵdarlamalaý salasynda jańa mansapty bastady, 12% kóbirek kiris taba bastady nemese qyzmetinde joǵarylady, 39% óz mansabynda ózge de artyqshylyqtarǵa ie boldy. Kýrsqa shamamen 1,9 million adam qyzyǵýshylyq tanytty.
Qazaqstandyqtarǵa arnalǵan kýrstardan basqa, kez kelgen adam úshin birneshe aqysyz baǵdarlama bar. Mysaly, álem boiynsha 1 millionnan astam adam niet tanytqan «Mansapta ósýge arnalǵan aǵylshyn tili» kýrsy. Ol aǵylshyn tilinde sóilemeitin, alaida óziniń eńbek jolynda álemdik naryqta baq synaǵysy keletin jandarǵa baǵyttalǵan.
Oqytý nátijesi kórsetkendei, kýrsty aiaqtaǵandardyń 40% jańa mansapty bastasa, 41% qyzmet kókjiegi keńeiip, 17% kirisin kóbeitti nemese jumysta joǵarylady.
Eske sala ketsek, Coursera alańyndaǵy tegin oqý kýrstary 15 qazanǵa deiin elektrondy eńbek birjasy arqyly ótinim bergen jáne 31 qazanǵa deiin coursera.org platformasynda tirkelgenin rastaǵan azamattarǵa jyldyń sońyna deiin qoljetimdi.
