KZ-CERT «Memlekettik tehnikalyq qyzmet» AQ aqparattyq qaýipsizdik jaǵdaiyn zertteý aiasynda kompiýterlik intsidentterge yqpal etý qyzmeti Facebook áleýmettik jelisiniń 3 millionnan astam qazaqstandyq qoldanýshysy týraly derekter jelige tarap ketkenin anyqtaǵan, dep habarlaidy "Ult aqparat".
«Keshe hakerlik forým qoldanýshylarynyń biri Facebook áleýmettik jelisiniń 106 elinen 533 millionnan astam qoldanýshy týraly málimetter bazasyn jariialady. Materialdardy zerttei kele, Qazaqstandaǵy 3 214 990 qoldanýshynyń aty-jóni men tegi, telefon nómiri, turatyn eli/qalasy, jumys orny jáne oqýy týraly málimetter jelige tarap ketkeni anyqtaldy» dep jazylǵan «Memlekettik tehnikalyq qyzmet» kompaniiasynyń saitynda.
Atalǵan paraqshada jazylǵandai, jeli qoldanýshylarynyń jeke málimetteriniń tarap ketýiniń saldary aýyr bolýy múmkin.
Qaskúnemder jeke málimetterdi paidalana otyryp jeli qoldanýshysyn bopsalaýy, bank kartochkasynan aqsha shyǵaryp alýy, jeke ómirine aralasýy múmkin, tipti balalary qaida oqitynyn bilip alyp, ziian keltirýi múmkin.
«Kompiýterlik intsidentterge yqpal etý qyzmeti qazaqstandyqtardy ártúrli kózderden habarlamalar men qońyraýlar alý kezinde saq bolýǵa shaqyrady. Esterińizge sala keteiik, Qazaqstan Respýblikasynda jeke derekterdi jinaý jáne taratý «Derbes derekter jáne olardy qorǵaý týraly» Zań negizinde júzege asyrylady. Bul zań sheteldik saittarǵa qoldanylmaidy, sondyqtan jeke derekterińizdi saqtaý úshin jáne qaskúnemderden qorǵaný úshin otandyq áleýmettik jelilerdi qoldanýdy usynamyz» delingen habarlamada.
