Almatyda 3 adamnyń ólimine sebepker bolǵan Gelandewagen júrgizýshisi óz kinásin ishinara moiyndady, dep habarlaidy QazAqparat tilshisi.
«Iliias Kar QR jol erejesin buzyp, sonyń saldarynan abaisyzda 3 adamnyń ólimine sebepker bolǵany úshin QR QK 345-babynyń 4-bólimimen aiyptalyp otyr. Sondai-aq, aiyptalýshy Karǵa QR JQE 2 jáne 8-tarmaqtaryn buza otyryp, jol apatynan keiin japa shekkenderdi meditsinalyq organdarǵa aparmai, oqiǵa ornynda qaldyryp ketkeni úshin QR QK 347-babymen aiyp taǵylyp otyr», - dedi prokýror.
Al aiyptalýshynyń ózi kinásin ishinara ǵana moiyndady.
«Men óz aiybymdy moiyndap otyrmyn. Biraq ishinara. Men mas boldy degen aiyppen kelispeimin. Sonymen qatar, oqiǵa ornynan ketip qaldy degen 374-bappen de kelispeimin. Men sol jerde boldym. Eshqaida ketken joqpyn», - dedi Iliias Kar.
Sot otyrysyna marqum aktrisa Sholpan Elgezekovanyń anasy men týystary, áriptesteri qatysty.
Aita keteiik, qaiǵyly oqiǵa 29 jeltoqsanda bolǵan edi. Abai men Seifýllin kósheleriniń qiylysynda Mersedes Gelandewagen jáne Mitsubishi Galant kólikteri soqtyǵysqan bolatyn. Mersedes Gelandewagen kóligi baǵdarshamnyń qyzyl túsine ótip ketken. Jol apatynan 3 adam - Mitsubishi Galant júrgizýshisi men eki jolaýshy kóz jumdy.
Olardyń arasynda belgili aktrisa Sholpan Elgezek bar. Keiin belgili bolǵandai, 34 jastaǵy Gelandewagen júrgizýshisi kóligin mas kúiinde júrgizgen.
«Mercedes Gelandewagen» markaly avtomobil júrgizýshisi, 1985 jyly týǵan Kar Iliias Abai jáne Seifýllin dańǵyldarynyń qiylysynda jol apatyn jasaǵandyqtan, QR Qylmystyq-protsesýaldyq kodeksiniń 128-babyna sáikes ustaldy. Sotqa deiingi tergep-tekserý Qylmystyq kodekstiń 345-babyna jáne 347-babynyń 3-bóligine sáikes júrgizildi.
Eske sala keteiik, atalǵan jol apatynan aman qalǵan jalǵyz jolaýshy - aktrisa Aizada Satybaldieva qabyrǵalary synyp, aýyr halde aýrýhanaǵa túsken bolatyn. Eki aptadan soń aktrisanyń beti beri qarap, úiine shyǵaryldy.
