Foto: Jambyl oblysynyń Politsiia departamenti
Jambyl oblysynda aýa-raiynyń qolaisyzdyǵyna bailanysty 26 kólik soqtyǵysty, dep habarlaidy "Ult aqparat" óńirdiń politsiia departamentine silteme jasap.
"Politsiia qyzmetkerleriniń jol qozǵalysy erejelerin saqtaý, qolaisyz aýa-raiynda jolǵa shyqpaý týraly birneshe márte eskertýlerine qaramastan, júrgizýshiler erejeni buzýdy jalǵastyryp jatyr. Atap aitqanda, jyldamdyqty asyryp, qashyqtyqty saqtamaidy jáne jazǵy shinalarmen júredi, bul óz kezeginde jol-kólik oqiǵalaryna ákep soǵady.
31 qańtarda saǵat 10:47-de Jýaly aýdany Nurlykent aýylynyń mańynda "Batys Eýropa-Batys Qytai" respýblikalyq mańyzy bar avtojolynyń 567-shaqyrymynda aýa raiynyń qolaisyzdyǵyna bailanysty (kóktaiǵaq, kórinýdiń shektelýi, boran) 26 avtokóliktiń (4 jolaýshylar avtobýsy, 4 júk kóligi jáne jeńil kólikter) qatysýymen jol-kólik oqiǵasy oryn aldy.
JKO saldarynan qaza tapqandar joq. Baýyrjan Momyshuly aýylynyń ortalyq aýdandyq aýrýhanasyna túrli dárejedegi dene jaraqattarymen 25 adam júgindi" - delingen habarlamada.
Vedomstvo málimetinshe, Taraz qalasynan 593-ten 534 shaqyrymǵa deiingi baǵyttaǵy avtojol eki jaǵynan da jabyq.
"Oqiǵa ornynda politsiia qyzmetkerleri jumys jasap jatyr, oqiǵanyń mán-jailary anyqtalýda.
Jambyl oblysynyń Politsiia departamenti jol qozǵalysy erejelerin ásirese aýa raiy qolaisyz bolǵan jaǵdaida qatań saqtaý qajettigin eske salady" - delingen habarlamada.
