Qazaqstandyq jas rejisser Ramazan Haliollanyń «Dombyra» filmi Niý-Deli qalasynda ótken 8-shi Halyqaralyq qysqametrajdy filmder kinofestivalinde (Delhi Shorts International Film Festival) júldeli boldy, dep habarlaidy "Ult aqparat".
«Qazaqfilm» AQ-nyń baspasóz qyzmetinen málim etkendei, kartina «Úzdik film» atalymynda jeńimpaz atandy.
QR Mádeniet jáne sport ministrliginiń tapsyrysy boiynsha, Sh.Aimanov atyndaǵy «Qazaqfilm» AQ-nyń «Debiýt» shyǵarmashylyq-óndiristik birlestigi túsirgen kinofilm dombyranyń qulaǵynda oinap, úlken sahnada óner kórsetýdi armandaǵan Áset esimdi balanyń ómirin baiandaidy.
Aita ketsek, atalǵan týyndy biyl Almatyda ótken «Baiqonyr ISFF» IV Halyqaralyq kinofestivaliniń konkýrstan tys baǵdarlamasynda kórsetilip, «Brodveidiń tańdaýy» syilyǵyn aldy.
Niý-Delidegi DSIFF halyqaralyq kinofestivali alǵash ret 2012 jyly ótken bolatyn. Uiymdastyrýshysy – Miniboxoffice úndi kompaniiasy. Biyl festivaldiń halyqaralyq qazylar alqasyn ispan rejisseri Viktor Manýel Lopesmýnos basqardy. Sonymen qatar, qazylar alqasy quramynda: prodiýser Viktoriia Sil (Japoniia), rejisser Rakel Rýiz (Argentina), rejisser Prashant Segal (Úndistan) boldy.
Ramazan Haliolla 1994 jyly 15 mamyrda Qaraǵandy oblysy, Balhash qalasynda dúniege kelgen. 2012-2017 jyldar aralyǵynda Nursultan qalasyndaǵy Qazaq ulttyq óner ýniversitetinde «Rejisser, kino jáne telearna prodiýsseri» mamandyǵy boiynsha oqyǵan.
