Osy jyldyń birinshi toqsanynda 1055 Resei azamaty Qazaqstanǵa ýaqytsha turýǵa ótinish bildirdi. Bul ótken jyldarmen salystyrǵanda eki-úsh esege kóp.
Bul týraly ishki ister ministriniń birinshi orynbasary Marat Qojaev málimdedi, dep habarlaidy Sputnik Qazaqstan.
Májilis otyrysynda depýtattar Ýkrainadaǵy oqiǵaǵa bailanysty aqpan-naýryz ailarynda Resei men Ýkrainadan qansha azamat Qazaqstanǵa kelgenin, qansha adam azamattyq pen yqtiiarhat alýǵa ótinish bergenin surady.
Marat Qojaevtyń aitýynsha, birinshi qańtardan beri respýblikaǵa 457 myń sheteldik kelgen. Onyń deni – kórshi elderden, eń kóbi – ózbekter, ekinshi orynda – Resei azamattary.
"24 aqpannan 11 sáýirge deiin 130 myń Resei azamaty elimizge kirgen. 120 myńnan astamy shyǵyp ketti. Byltyrǵy jylmen salystyrǵanda, bul kórsetkish eki ese ósip otyr. Biraq 2020-2021 jyldary pandemiiaǵa bailanysty shekara jabylǵanyn bilesizder. Al onyń aldyńǵy jyldary – 2018-2019 jyldarmen salystyrǵanda, bul san úsh esege az. Ol jyldary birinshi toqsanda elimizge Reseiden 350-360 myń adam kirip-shyǵyp turdy", - dedi Qojaev májilis otyrysynda.
Al osy jyldyń birinshi toqsanynda Ýkrainadan Qazaqstanǵa 3481 adam kelgen.
Qojaev keltirgen statistikaǵa súiensek, búginde 170 reseilik jáne jeti ýkraindyq Qazaqstan azamattyǵyn alýǵa ótinish bildirdi. Bul ótken jyldardaǵy kórsetkishpen birdei.
2019 jyly Reseiden 200-den astam azamat Qazaqstan azamattyǵyn alýǵa ótinish bildirgen.
Budan bólek, Qojaev biyl Qazaqstanda ýaqytsha turýǵa suranyp otyrǵan sheteldikter azdap óskenin atap ótti.
"Ótken jyldary bir toqsanda 350-400 adam ýaqytsha turýǵa suransa, qazir myńnan asyp ketti. Biyl birinshi toqsanda Reseiden kelgen 1055 adam bizdiń elde ýaqytsha turýǵa suranyp jatyr", - dedi Qojaev.
