32,8 million bastan astam maldy qystan aman-esen alyp shyǵý úshin oblys ákimdikterimen birlesip jem-shóp daiyndaý jospary aiqyndaldy. Bul týraly QR aýyl sharýashylyǵy ministrliginen málim boldy, dep habarlaidy QazAqparat.
«Malǵa beretin ekpe shóp alqaby 3,2 mln gektardy quraidy. Bul ótken jylmen salystyrǵanda 13 myń gektarǵa artyq. Al malǵa jem retinde beriletin daqyldardyń egis alqaby 2,6 mln gektar. 2021 jyldyń 22 qyrkúiegindegi jaǵdai boiynsha 23,2 mln tonna shóp jinaldy. Bul jospardyń (23,8 mln tonna) 98%-ǵa oryndalǵanyn kórsetedi. Budan bólek, 1,5 mln tonna (94%) pishendeme, 1 mln tonnadan astam (53%) súrlem, 2,9 mln tonna (61%) saban daiyndaldy», - delingen ministrlik málimetinde.
Biylǵy aýa raiynyń qolaisyzdyǵy mal azyǵy qoryn jinaýǵa edáýir qiyndyq týǵyzdy. Atap aitqanda, qurǵaqshylyqtyń kesirinen jaiylymdardyń basym bóligi qýrap qaldy, tabiǵi shabyndyq jerlerde de shóp qalyń bolmady.
«Jaǵdaidy turaqtandyrý úshin Ministrlik naqty sharalar qabyldaýda. Jem-shóp daiyndaý máseleleri boiynsha jergilikti jáne ortalyq atqarýshy organdardyń qyzmetin úilestirý jónindegi respýblikalyq jedel shtab qurylyp, jumys istep jatyr. Qurǵaqshylyqtan zardap shekken aimaqtarǵa qarjylai kómek kórsetildi. Máselen, Mańǵystaý men Qyzylorda oblystaryndaǵy jem-shóp satyp alýǵa jumsalǵan shyǵyndardy óteýge Úkimet rezervinen 3,6 mlrd teńge bólindi. Búgingi tańda Mańǵystaý oblysynda 1,2 mlrd teńge igerilip, 632 sharýa qojalyǵy men 6021 jeke qosalqy sharýashylyqtyń shyǵyny tólendi. Qyzylorda oblysyna 1,7 mlrd teńge bólinip, onyń 1 mlrd teńgesi 692 sharýa qojalyǵynyń shyǵynyn óteýge jumsaldy», - dep atalyp ótken habarlamada.
Mańǵystaý oblysynyń ákimdigi jergilikti biýdjetten shóp pen jem satyp alýǵa qosymsha 5,3 mlrd teńge (1,9 mlrd teńge – 26 myń tonna shóp satyp alýǵa jáne 3,4 mlrd teńge – 34 myń tonna jem satyp alýǵa) bóldi. Mal azyǵy qunynyń qymbattaýyna bailanysty birqatar oblys ákimdikteri (Aqtóbe, Qostanai, Pavlodar, SQO, Atyraý, Shymkent q.) jem-shóp satyp alý qunyn arzandatý úshin jergilikti biýdjetten 13,6 mlrd teńge qarjy bóldi. Aqtóbe oblysy biyl 6,7 mlrd teńge bólip, oblystyń barlyq agroqurylymdaryn sýbsidiiamen qamtydy.
Biyl tamyz aiynyń 23-inen bastap malǵa beretin shóp túrlerin respýblika aýmaǵynan shyǵarýǵa ýaqytsha tyiym salyndy. Sondai-aq malǵa jem retinde beretin daqyldar eksportyn kvotalaý jónindegi buiryqtyń jobasy ázirlendi.
