Memleket basshysy Ulttyq qaýipsizdik komitetiniń tóraǵasy Ermek Saǵymbaevty qabyldady, - dep habarlaidy "Ult aqparat" Aqordaǵa silteme jasap.
Qasym-Jomart Toqaevqa vedomstvonyń osy aida atqarǵan qyzmetiniń negizgi qorytyndylary, aldaǵy kezeńge arnalǵan mindetteri men Ulttyq qaýipsizdik komitetin reformalaý týraly Jarlyqty júzege asyrý sharalary týraly esep berildi.
Ermek Saǵymbaev Prezidentke UQK organdarynyń halyqaralyq lańkestikke qarsy is-qimyldary, esirtki men qarý-jaraqtyń, sonyń ishinde qańtar oqiǵasy kezinde urlanǵan qarýlardyń zańsyz ainalymyna tosqaýyl qoiýǵa, Memlekettik shekaralardy nyǵaitýǵa baǵyttalǵan sharalar týraly baiandady.
Memleket basshysyna berilgen málimetterge sáikes, atqarylǵan is-sharalar nátijesinde birqatar halyqaralyq jáne aimaqtyq esirtki tasityn joldar jabyldy, zańsyz ainalymdaǵy 15 keliden astam psihotroptyq zattar men 4 tonna prekýrsor tárkilendi. Qarý-jaraq pen oq-dárilerdi satýmen ainalysqan qylmystyq toptardyń áreketiniń joly kesilip, jasyryn qoimalar anyqtaldy.
Terrorizmge qarsy ortalyq shtabtyń jaýyngerlik daiyndyq deńgeiin saqtaý úshin 3 komandalyq-shtabtyq jáne 29 jedel-taktikalyq oqý-jattyǵý jiyny ótkizildi. El shekarasyn kúzetý barysynda 632 quqyq buzýshy ustaldy. Sonymen qatar Kaspiide 11 shaqyrymnan astam brakonerlik qural tárkilendi.
Quny 230 million teńgeden asatyn valiýta men altynnyń, 77,9 million teńge bolatyn taýarlardyń jáne 2,5 million teńge kólemindegi janar-jaǵarmaidyń zańsyz ainalymyna tosqaýyl qoiyldy.
Sonymen qatar, Memleket basshysyna Ulttyq qaýipsizdik komitetin reformalaý jónindegi tapsyrmasynyń oryndalý barysy, sonyń ishinde negizgi jedel qyzmetterge el basshylyǵynyń tapsyrmalaryn júzege asyrýdy qamtamasyz etetin jáne osy saladaǵy qyzmettiń tiimdiligin arttyratyn qajetti qurylymdyq ózgerister engizý barysy týraly baiandaldy.
