Elordada 23 jyl ishinde halyq sany úsh ese ósip, 2020 jyldyń mamyr aiynda 1 149 947 adamǵa jetti, dep habarlaidy qala ákimdiginiń saity.
1997 jylǵa deiin sol kezdegi Tselinograd, keiinirek Aqmola 300 myńnan astam adam turatyn oblys ortalyǵy boldy. Demografiialyq kórsetkish qala Qazaqstannyń jańa astanasy bolǵannan keiin kúrt ósti. 23 jyl ishinde halyq sany úsh ese ósip, 2020 jyldyń mamyr aiynda 1 149 947 adamǵa jetti. Osylaisha, ósim 849,442 adamdy qurady. 1999 jyldyń basynda qalada bir jastaǵy bala sany 3 853, al ǵasyr jasaǵan segiz adam ǵana boldy. Búgingi tańda elorda turǵyndarynyń eń úlken kontingenti bir jastaǵy bala sany – 29 516, al ǵasyrdan uzaq jasaǵandar sany júzden asady!
Sońǵy jyldary Qazaqstannyń bas qalasy turǵyndar sany boiynsha álem astanalarynyń kóbin, onyń ishinde Vashingtondy (705 myń adam) basyp ozdy. «1999, 2000, 2001 jyldary qala halqynyń ósýi jyl saiyn 50 myńǵa jýyq adamdy qurady. Muny rekordtyq kórsetkishterdiń biri dep aitýǵa bolady. Bul ishki kóshi-qonǵa da, tabiǵi ósimge de bailanysty. Biraq naǵyz dúmpý 2016 jyly boldy: sodan keiin qala halqy birden júz myń adamǵa kóbeidi», – dedi Nur-Sultan qalalyq statistika basqarmasy.
Sonymen qatar, statistikaǵa súiensek, respýblikamyzdyń astanasynda erlerge qaraǵanda áielder az. Osy jyldyń mamyr aiynyń basyna qalada 598 009 áiel jáne 551 938 er adam turady. Eń tyǵyz qonystanǵan aýdan – Saryarqa, onda 340 myńnan astam adam turady. Odan keiin Almaty aýdany – 299 myń, Esil aýdany – 272 myń jáne Baiqońyr – 237 myń adam.
Qazaqstanda Astana kúni 6 shildede toilanady.
