Ǵylym jáne joǵary bilim ministri Saiasat Nurbek Ýkrainadan Qazaqstandaǵy joǵary oqý oryndaryna 20 myńnan asa stýdent aýysqysy keletinin aitty. Áńgime Úndistan men Pákistan jastary týraly bolyp otyr, - dep habarlaidy Tengrinews.kz agenttigi "Astana" telearnasyna silteme jasap.
"Qazir 23 myń Úndistan men Pákistan stýdenti esigimizdi qaǵyp jatyr. Olar - Ýkrainanyń meditsinalyq ýniversitetterinde bilim alǵan stýdentter jáne qazir belgili sebeptermen onda oqi almaidy. Qazir biz ne istei alatynymyzdy oilap jatyrmyz", - dedi Saiasat Nurbek.
Mundai málimdemeler reseilik joǵary oqý oryndarynyń sheteldik stýdentterinen de túsetini atap ótildi. Sonymen qatar, sol meditsinalyq ýniversitet professorlary Qazaqstanda sabaq berýge niet bildirgen. Biraq, Saiasat Nurbektiń aitýynsha, keiingi jyldary Qazaqstanda jańa akademiialyq habtar salynbaǵan.
"Biz akademiialyq infraqurylym týraly oilanýymyz kerek, osyndai ósip kele jatqan mólsherdi qabyldap, óńdei alamyz ba? Bul qysym kúsheie túsedi", - dep qosty ministr.
Ǵylym jáne joǵary bilim ministri tyǵyryqtan shyǵý jolyn ýniversitet ǵimarattaryn keńeitýden ǵana emes, tsifrlyq ýniversitetterden de kóretinin aitty. Onyń aitýynsha, qazirdiń ózinde mundai oqý oryndarynyń úlgileri ázirlenip jatyr.
