2,3 millionnan astam qazaqstandyq karantin kezinde tabysynan aiyrylýyna bailanysty 42500 teńgeden aldy, dep habarlaidy "Ult aqparat" QR Eńbek jáne halyqty áleýmettik qorǵaý ministrligine silteme jasap.
17 tamyz saǵat 09.00-degi jaǵdai boiynsha, Memlekettik áleýmettik saqtandyrý qorynan (budan ári – MÁSQ) birjolǵy tólem taǵaiyndaýǵa 2 mln 564 myńnan astam ótinish qabyldandy. Tólem kólemi eń tómengi jalaqy mólsheri – 42 500 teńgege teń. Tólem 2 mln 350,3 myń adamǵa taǵaiyndaldy, onyń 2 mln 341,1 myńyna qarjylai kómek aýdaryldy. Sondai-aq tamyz aiynda karantinniń uzartylýyna bailanysty 2 mln 328,2 myń adamǵa 21 250 myń teńgeden (eń tómengi jalaqynyń jartysy) qosymsha berildi. Tólem berý jumystary odan ári jalǵasýda.
MÁSQ-tan tólem alýǵa ótinimder birneshe arna arqyly qabyldanady. 2 mln 564 myńnan astam ótinimniń ishinde:
– 834,8 myń adam proaktivti formatta tólem taǵaiyndaýǵa kelisim bergen;
– 666,5 myń adam Egov.kz portaly jáne telegram-bottar arqyly;
– 401,9 myń adam 42500.enbek.kz portaly arqyly;
– 660,7 myń adam ekinshi deńgeili bankterdiń mobildik qosymshalary men internet-resýrstary arqyly;
– 0,3 myń adam shtabtar arqyly ótinish bergen.
Azamattardyń sanattary bólinisinde:
– 834,8 myń ótinish biryńǵai jiyntyq tólem tóleýshilerden kelgen (proaktivti formatta);
– 252,4 myń ótinishti jaldamaly qyzmetkerleri úshin jumys berýshiler bergen;
– 1 mln 477 myń ótinish azamattardyń basqa sanattarynan kelip tústi (jeke kásipkerler, jeke praktikamen ainalysatyn adamdar, azamattyq-quqyqtyq sipattaǵy sharttar boiynsha tabys alatyn jeke tulǵalar).
2020 jyldyń shildesinde MÁSQ-tan birjolǵy tólem alǵan qazaqstandyqtarǵa karantinniń uzartylýyna bailanysty qosymsha aqy avtomatty túrde taǵaiyndalady. Qaita ótinish berýdiń qajeti joq.
Karantin uzartylǵannan keiin birjolǵy tólem taǵaiyndaýǵa alǵash ret ótinish bergen azamattarǵa tólem 1,5 ETJ nemese 63 750 teńge (42 500 + 21 250 teńge) mólsherinde taǵaiyndalady. Ótinish qabyldaý 2020 jyldyń 1 qyrkúiegine deiin jalǵasady.
