QR Eńbek jáne halyqty áleýmettik qorǵaý ministri Birjan Nurymbetov Ataýly áleýmettik kómek qansha kólemde artqanyn aitty, dep habarlaidy QazAqparat.
«Ataýly áleýmettik kómekti reformalaýǵa daiyndyq Dúniejúzilik bankpen yntymaqtastyq sheńberinde úshinshi kezeńde bastaldy. Osylaisha, 2014-2017 jyldar aralyǵynda elimizde kezeń-kezeńimen «Órleý» pilottyq jobasy iske asyryldy, nátijesinde kómek alýshylar úshin áleýmettik kelisimsharttar júiesi, kómek alý sharttary, sondai-aq tabysy az otbasylardy súiemeldeý praktikasy engizildi. Osy maqsattarda biýdjetten 14,8 mlrd teńge bólindi. AÁK boiynsha reformalardy 2018 jyly jalǵastyra otyryp, biz AÁK taǵaiyndaý quqyǵyn (kedeilik shegin) anyqtaý úshin tabys deńgeiine qoiylatyn ólshemderdi alǵash ret ózgerttik, ol eń tómen kúnkóris deńgeiiniń 40-tan 50 paiyzǵa deiin kóterildi. Nátijesinde, AÁK alýshylar sany 20 ese artty (2017 jylmen salystyrǵanda- avt.). Biyl 27 aqpanda Elbasynyń «Nur Otan» partiiasynyń XVIII sezinde bergen tapsyrmasyn júzege asyrý maqsatynda AÁK taǵaiyndaý tetigi ózgertildi», - dep toqtaldy ministr Parlament Májilisindegi Úkimet saǵatynda.
Atap aitqanda, osy jylǵy 1 sáýirden bastap kedeilik shegi 50-den 70 paiyzǵa deiin ósti (14 849-dan 20 789 teńgege deiin); tabysy az otbasynan shyqqan árbir balaǵa AÁK mólsheri 20 789 teńge kóleminde belgilengen.
Sonymen qatar, shartsyz aqshalai kómek kórsetý merzimi 3 aidan 6 aiǵa deiin, shartty aqshalai kómek 6 aidan 12 aiǵa deiin uzartyldy.
«Biylǵy qarasha aiynyń basyndaǵy jaǵdaimen, shamamen 456 myń otbasy nemese 2,1 mln adam memleketten naqty qoldaý aldy. Bul osy jylǵy 1 toqsandaǵy uqsas kórsetkishterden 7,7 ese artyq. Taǵaiyndalǵan AÁK ortasha mólsheri de 1,8 ese artty. Alǵashqy ret biýdjette AÁK tóleýge 245 mlrd teńge kózdelgen», - dedi B. Nurymbetov.
