Qazaqstan aýmaǵynda karantin 2 aptaǵa sozylady. Osyǵan bailanysty Mindetti áleýmettik saqtandyrý qorynan (MÁSQ) karantindik shekteý sharalarynyń engizilýine bailanysty tabysynan aiyrylǵandarǵa bir jolǵy tólem alýshylarǵa tólenetin 42500 teńgege qosymsha 0,5 eń tómengi jalaqy (budan ári – ETJ) avtomatty túrde aýdarylady, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Karantin uzartylǵannan keiin MÁSQ-dan birjolǵy tólem taǵaiyndaýǵa alǵash ret ótinish bergen azamattarǵa tólem 1,5 ETJ nemese 63 750 teńge (42 500 + 21 250 teńge) mólsherinde taǵaiyndalady.
Budan buryn habarlanǵandai, Memleket basshysynyń tapsyrmasy boiynsha 2020 jylǵy shildede karantindik sharalardyń engizilýine bailanysty jumys isteitin qazaqstandyqtarǵa tabysyn tolyq joǵaltqan jaǵdaida bir eń tómengi jalaqy – 42 500 teńge mólsherinde birjolǵy tólem taǵaiyndaý júzege asyrylady.
Joǵaryda kórsetilgen tólemge azamattardyń kelesi sanattary úmitker bola alady:
1) memlekettik zańdy tulǵalardyń (sharýashylyq júrgizý quqyǵyndaǵy memlekettik kásiporyndardyń qyzmetkerlerinen basqa), sondai-aq aktsiialary men jarǵylyq kapitalyndaǵy qatysý úlesiniń 100% memleketke tiesili zańdy tulǵalardyń, ekinshi deńgeidegi bankterdiń, bank operatsiialarynyń jekelegen túrlerin júzege asyratyn uiymdardyń jáne olarmen úlestes zańdy tulǵalardyń qyzmetkerlerin qospaǵanda, jalaqysy saqtalmaityn demalystaǵy qyzmetkerler;
2) jeke kásipkerler;
3) jeke praktikamen ainalysatyn adamdar;
4) nysanasy jumystardy oryndaý (qyzmetterdi kórsetý) bolyp tabylatyn azamattyq-quqyqtyq sipattaǵy sharttar boiynsha tabys alatyn jeke tulǵalar;
5) biryńǵai jiyntyq tólemdi tóleýshiler bolyp tabylatyn jeke tulǵalar.
Esterińizge sala keteiik, 30 shilde saǵat 9.00-degi jaǵdai boiynsha azamattardan MÁSQ-dan birjolǵy tólem taǵaiyndaýǵa 2,3 mln-nan astam ótinish qabyldanǵan. Tólem 2 mln 80 myń adamǵa taǵaiyndaldy. Aqshalai qarajat 2 mln 58 myń qazaqstandyqqa aýdaryldy.
