Elordada «Ortalyq Aziiadaǵy sý máseleleri boiynsha dialog: Ulttyq arqyly jalpy óńirlikke» taqyrybymen Ortalyq Aziia sarapshylarynyń ekinshi forýmy ótip jatyr, dep habarlaidy QazAqparat tilshisi.
«BUU boljamyna qaraǵanda, 2050 jylǵa qarai jer beti turǵyndarynyń jartysy nemese 5,5 mlrd adam sý tapshylyǵyn sezetin bolady. Mundai jaǵdaida sý resýrstaryn turaqty basqarýdaǵy halyqaralyq yntymaqtastyq máselesi, ómirlik asa qajetti osynaý resýrsty kelesi býynǵa saqtaý barynsha ózekti bola túseri anyq. Bul másele Ortalyq Aziiada da barynsha ótkir tur. Boljamdy baǵalaýǵa sáikes, ǵasyr ortasyna taman bul óńirdiń halqy 90 mln adamnan asyp jyǵylmaq. Qazaqstan osyǵan orai óńirlik elderdiń kúsh-jigerin atalǵan máseleni tiimdi ári strategiialyq turǵyda utymdy sheshýge jumyldyrýǵa daiyn», - dedi forým jumysyn ashqan QR Prezidenti janyndaǵy Qazaqstannyń strategiialyq zertteýler institýtynyń direktory Zarema Shaýkenova.
BUU-nyń Preventivti diplomatiia jónindegi óńirlik ortalyǵynyń basshysy Natalia German bul forým Ortalyq Aziia elderiniń sarapshylyq institýtary arasyndaǵy yntymaqtastyqty nyǵaita túsýge baǵyttalǵan biregei shara ekendigin basa aitty.
«Forým óńirlik yntymaqtastyq shyn máninde Ortalyq Aziia elderi úshin basymdyqty sanalatyndyǵyn dáleldep otyr. Birikken Ulttar Uiymy bul umytylysty jan-jaqty qoldaidy. Búgingi bizdiń pikirtalasymyz sý resýrstary taqyrybyna arnalady. Bul - Ortalyq Aziia úshin barynsha tyńǵylyqty qaralýy tiis taqyryp. Sý bizdiń árqaisymyzdyń tirshiligimiz úshin máni zor resýrs. Sý – bul ómir», - dedi Natalia German.
Aita keteiik, forýmnyń birinshi kúninde sý-ekologiia, sý-energetika máselelerin sheshý boiynsha Ortalyq Aziia elderiniń ustanymdary men tásilderi jan-jaqty talqyǵa túsedi. Al halyqaralyq sharanyń Býrabaida jalǵasatyn ekinshi kúninde sarapshylar ekologiialyq, investitsiialyq jáne aqparattyq trendter men týrizmdi damytý máselelerin qozǵaidy.
