2030 jylǵa qarai sý tapshylyǵy 23,2 tekshe shaqyrymdy quraýy múmkin. Bul týraly QR Ekologiia, geologiia jáne tabiǵi resýrstar ministri Serikqali Brekeshev aitty, dep habarlaidy QazAqparat.
«2000 jyldary ortasha kópjyldyq ózen aǵyny 120 tekshe shaqyrym bolsa, qazirgi ýaqytta ol shamamen 102 tekshe shaqyrymdy quraidy. 2030 jylǵa qarai ózen aǵynynyń odan ári 99,4 tekshe shaqyrymǵa deiin qysqarýy boljanýda. Sý resýrstarynyń qysqarýy jáne halyqtyń, ekonomikanyń jáne ekologiianyń qajettilikterine sý tartý ósken jaǵdaida Qazaqstanda sý resýrstarynyń tapshylyǵy 2030 jylǵa qarai 23,2 tekshe shaqyrymdy quraýy múmkin», - dedi ministr ortalyq kommýnikatsiialar qyzmetindegi baspasóz máslihatynda.
Onyń atap ótýinshe, buǵan birqatar faktor áser etedi.
Bárinen buryn klimattyń ózgerýi, sý resýrstarynyń respýblikanyń aýmaǵy boiynsha birkelki bólinbeýi jáne soǵan bailanysty sý resýrstaryna júkteme bolyp tur.
«Sý resýrstaryna qatysty jaǵdai aimaqtarda aitarlyqtai ózgerýimen kúrdelene túsedi. Eldiń shyǵys aimaǵy sý resýrstarymen barynsha qamtamasyz etilgen. Ortalyq Qazaqstan eń az qamtamasyz etilgen. Kórshiles elderge eń táýeldi ońtústik jáne batys aimaqtar. Boljamdalǵan sý tapshylyǵy ońtústik jáne batys aimaqtarǵa da kóbirek áser etedi. Budan basqa, sý salasynyń aǵymdaǵy jai-kúiiniń eń ózekti problemalary eskirgen infraqurylym jáne sonymen bailanysty úlken shyǵyndar, sapaly sýdyń tapshylyǵy, tarif belgileýdiń álsiz tetigi, irgeles memlekettermen sý bólý máseleleri, sý resýrstaryn basqarý kezinde qabyldanatyn sheshimderdi álsiz ǵylymi súiemeldeý jáne bilikti kadrlardyń jetispeýshiligi bolyp qalýda», - dedi Serikqali Brekeshev.
