2026 jylǵa deiin meditsinalyq-sanitarlyq alǵashqy kómek kórsetetin 435 nysan ashý josparlanǵan. Bul jaiynda senatorlardyń depýtattyq saýalyna QR Premer-Ministri Asqar Maminiń jaýabynda aitylǵan, dep habarlaidy "Ult aqparat".
«KVI-men kúres boiynsha epidemiiaǵa qarsy is-sharalarǵa tartylǵan densaýlyq saqtaý júiesiniń qyzmetkerlerin yntalandyrý úshin táýekel deńgeiine bailanysty aiyna 212,5 myńnan 850 myń teńgege deiingi mólsherde jalaqyǵa ústemeaqylar tóleý júzege asyrylady. Memleket basshysynyń 2020 jylǵy 1 qyrkúiektegi Qazaqstan halqyna Joldaýynda bergen tapsyrmasyna sáikes yntalandyrý ústemeaqysyn tóleý 2020 jyldyń sońyna deiin jalǵasatyn bolady. Bul maqsatqa respýblikalyq biýdjetten 150 mlrd teńgege deiin bólinedi. Budan basqa, atalǵan qyzmetkerlerge KVI jáne virýstyq pnevmoniiamen aýrý nemese olardan qaitys bolý jaǵdailary boiynsha «Memlekettik áleýmettik saqtandyrý qory» AQ-dan birjolǵy áleýmettik tólemder tólenedi», - dedi Asqar Mamin.
Úkimet bashsysynyń atap ótýinshe, Densaýlyq saqtaý infraqurylymyn damytýdyń óńirlik perspektivalyq josparlaryna sáikes halyqqa meditsinalyq kómektiń qoljetimdiligin qamtamasyz etý úshin 2026 jylǵa deiin meditsinalyq-sanitarlyq alǵashqy kómek kórsetetin 435 nysandy (2020 jyly – 197, 2021 jyly – 77, 2022 jyly – 95, 2023-2025 jyldary – 66), onyń ishinde Mańǵystaý oblysynyń Munaily aýdanynda 150 tósektik aýdandyq aýrýhana (2020 jylǵa arnalǵan respýblikalyq biýdjetti aldaǵy naqtylaýǵa málimdelgen) ashý kózdelgen.
«Budan basqa, Shymkent qalasyn damytý men qurylys salýdyń keshendi josparynda 2023 jylǵa deiin Ońtústik Qazaqstan meditsina akademiiasynyń janynan 1000 tósektik kópbeiindi aýrýhana salý josparlanǵan», - dedi Premer-Ministr.
