Biyl joǵary bilimi bar kadrlardy daiarlaýǵa memlekettik tapsyrys kólemi aldyńǵy oqý jyldarynyń deńgeiinde saqtalyp otyr. Bul týraly Úkimet otyrysynda ǵylym jáne joǵary bilim ministri Saiasat Nurbek málimdedi, dep habarlaidy ult.kz.
Ol aldaǵy 2026-2027-shi oqý jylyna 89 457 memlekettik grant bólingenin atap ótti. Olardyń ishinde:
- bakalavriatqa – 75 371;
- magistratýraǵa – 11 007;
- doktorantýraǵa – 3 079.
Memlekettik tapsyrysty bólý el ekonomikasynyń 2030 jylǵa deiingi qajettilik boljamymen sáikestendirilgen.
«Granttardyń 60%-y injenerlik-tehnikalyq jáne aýyl sharýashylyǵy mamandyqtaryna, 21%-y pedagog kadrlardy daiarlaýǵa baǵyttalǵan», — dep atap ótti Saiasat Nurbek.
Vedomstvo málimetinshe:
- injenerlik, óńdeý jáne qurylys salalaryna - 19 250;
- pedagogikalyq ǵylymdarǵa – 13 738;
- aqparattyq-kommýnikatsiialyq tehnologiialar boiynsha – 11 662;
- jaratylystaný ǵylymdary, matematika jáne statistikaǵa – 9 363;
- aýyl sharýashylyǵy jáne bioresýrstarǵa – 3 145;
- densaýlyq saqtaý salasyna – 2 700;
- qyzmetter boiynsha – 2 400;
- óner jáne gýmanitarlyq ǵylymdarǵa – 1 915;
- áleýmettik ǵylymdar, jýrnalistika jáne aqparat boiynsha – 1 485;
- biznes, basqarý jáne quqyqqa – 1 423;
- veterinariiaǵa – 1 275 grant bólingen.
Oǵan qosymsha elimizdiń joǵary oqý oryndary «Serpin» baǵdarlamasy aiasynda kásiptik baǵdar berý jumystaryn júrgizýde. Is-sharalarmen 13 myńnan astam oqýshy, 2 myńǵa jýyq ata-ana jáne 700-den astam kásiptik baǵdar berýshi qamtylǵan.
Osylaisha, búginde oqýshynyń kásibi diagnostikasynan bastap bilim berý baǵdarlamasyn tańdaýǵa jáne odan ári jumysqa ornalasýǵa deiingi bilim berý navigatsiiasynyń birtutas júiesi qalyptasýda.
