Foto: egemen.kz
Eldegi eń tómengi jalaqy mólsheri burynǵy deńgeide qalatyndyqtan, MÁMS tólemderiniń kóbi ózgermeidi, dep habarlaidy Áleýmettik meditsinalyq saqtandyrý qorynyń baspasóz qyzmeti.
Belgili bolǵanyndai, derbes tóleýshiler men jeke kásipkerler úshin jarnalardy esepteý negizi retinde eń tómengi jalaqyny alatynyn eskersek, 2025 jyly onyń mólsheri sol kúiinde qalady – 85 000 teńge. Demek, jarnalar mólsheri de ózgermeidi.
Jumys berýshiler men jumysshylar úshin stavkalar da ózgerissiz qalady – sáikesinshe 3% jáne 2%.
Tek birjolǵy tólem mólsheri ózgeredi – 21,5%-dan 23,8%-ǵa deiin, sondai-aq jeńildetilgen kategoriiadaǵy azamattar úshin memleket tarapynan jarnalar mólsheri ózgeredi – ortasha ailyq jalaqynyń 1,9%-ynan 2%-yna deiin, bul kórsetkish ótken eki jyldaǵy aǵymdaǵy qarjy jylynyń ortasha ailyq jalaqysynan esepteledi. Bul málimetti memlekettik statistika salasyndaǵy ýákiletti organ anyqtaidy. Ulttyq statistika biýrosynyń málimeti boiynsha 2023 jyldyń qorytyndysy boiynsha eldegi ortasha ailyq jalaqy 364 295 teńge, - delingen habarlamada.
Osylaisha, 2025 jyly MÁMS tólemderiniń mólsheri kelesidei bolady:
Jumys berýshilerdiń jarnalary – qyzmetkerdiń tabysynan 3%;
Jumysshylardyń jarnalary – tabystyń 2%-y;
Birjolǵy tólem tóleýshiler – jalaqy qorynan 23,8%;
Azamattyq-quqyqtyq sharttar boiynsha jumys isteitin jeke tulǵalardyń jarnalary – tabystyń 2%-y;
Jeke kásipkerlerdiń, jeke praktikamen ainalysatyn tulǵalardyń jarnalary – 5 950 teńge (AEK-tiń 1,4 eselengen mólsheriniń 5%-y, sáikes qarjy jylynyń respýblikalyq biýdjet zańymen bekitilgen);
Derbes tóleýshilerdiń jarnalary – 4 250 teńge (AEK-tiń 5%-y);
Memleket tarapynan MÁMS-ke tólenetin jarnalar – 7 285,9 teńge.
MÁMS jarnalaryn «Qazposhta» AQ, ekinshi deńgeili bankterdiń kassalary men mobildi qosymshalary, sondai-aq terminaldar arqyly tóleýge bolady.
