2025 jylǵa qarai aýyldarda balalarǵa arnalǵan 1 600 úiirme ashylady. Bul týraly Úkimet otyrysynda QR Mádeniet jáne sport ministri Aqtoty Raiymqulova aitty, dep habarlaidy QazAqparat.
«Aýyl turǵyndary úshin zamanaýi, jaily áleýmettik-mádeni jáne sporttyq orta qurý, aýyldy eldi mekenderde turatyn balalardyń shyǵarmashylyq jáne sporttyq áleýetin damytý ministrliktiń basty mindeti. Búginde aýyldyq jerde 6 myńnan astam mádeniet uiymy bar. Nur Otan partiiasynyń sailaýaldy baǵdarlamasyn oryndaý jónindegi jol kartasy aiasynda «Jumyspen qamtý jol kartasy», «Aýyl – el besigi» baǵdarlamasy, jergilikti biýdjet, jeke investitsiia tartý jáne memlekettik-jekeshelik áriptestik tetikterin paidalaný esebinen 748 infraqurylymdyq joba iske asyrylady. Onyń ishinde 180 jańa mádeniet nysanynyń qurylysy men 568 nysanǵa jóndeý júrgiziledi», - dedi ol.
Aqtoty Raiymqulova Memleket basshysynyń 2020 jyly 1 qyrkúiektegi «Jańa jaǵdaidaǵy Qazaqstan: is-qimyl ýaqyty» atty Qazaqstan halqyna Joldaýynda aitylǵan tapsyrmasy aiasynda balalar men jasóspirimderdiń shyǵarmashylyq áleýetin damytý maqsatynda ministrlik balalar úiirmeleriniń qyzmetin jańartý boiynsha belsendi jumys istep jatqanyn aitty.
«Búgingi tańda aýyldarda barlyǵy 12 000 shyǵarmashylyq úiirme jumys isteidi. Onyń ishinde 115,2 myń bala shuǵyldanatyn balalar men jasóspirimderge arnalǵan 9 000 úiirme bar. Qosymsha shyǵarmashylyq úiirmeler ashý jáne balalar men jasóspirimderdiń sapaly bos ýaqytyn uiymdastyrý maqsatynda 2021 alǵash ret memlekettik shyǵarmashylyq tapsyrys engizildi. 2025 jylǵa deiin respýblika boiynsha qosymsha aýyldyq eldi mekenderde qosymsha 1600 úiirme ashylady. Nátijesinde qosymsha 42 myń bala memlekettik shyǵarmashylyq tapsyryspen qamtylady jáne balalar men jasóspirimderge arnalǵan shyǵarmashylyq úiirmeler sany 10 600-ge jetedi», - dedi ministr.
