gov.kz
Mastercard kompaniiasynyń málimetinshe, 2025 jyly qańtar–qarasha aralyǵynda sheteldik týrister Almaty qalasyndaǵy túrli oryndar men kórikti jerlerge joǵary qyzyǵýshylyq tanytqan. Eń tanymal baǵyt retinde Shymbulak taý shańǵy kýrorty tirkelip, onyń úlesi 30,62% boldy. Bul týraly Almaty qalasynyń Týrizm basqarmasynyń ókilderi aitty.
Týrister arasynda suranysqa ie ózge oryndar qatarynda: Úlken Almaty kóli – 7,84%, Medeý – 6,24%, MEGA saýda-oiyn-saýyq ortalyǵy – 5,52%, Arbat – 4,64%, Sharyn shatqaly – 4,35%, Ortalyq mádeniet jáne demalys saiabaǵy – 4,35%, Kólsai kóli – 3,92% bar.
Mádeni-tarihi jáne rýhani nysandar ishinde kósh bastap turǵandar: Kóktóbe – 12,8%, Voznesenskii shirkeýi – 12%, Qazaqstan Respýblikasynyń Ortalyq memlekettik mýzeii – 7,2%, Kók bazar – 6,4%, Tuńǵysh Prezident saiabaǵy – 4%, Yqylas atyndaǵy halyq mýzykalyq aspaptar mýzeii – 4%, Almatynyń Ortalyq meshiti – 3,2%.
Atalǵan derekter týrister qyzyǵýshylyǵynyń alýan túrli ekenin jáne qalanyń biregei mádeni murasyna degen nazardyń joǵary ekenin kórsetedi. Týrizm basqarmasynda atap ótkendei, Almaty taýlary týrister úshin negizgi oryn bolyp qala beredi. Al «Shymbulaq» pen «Oi-Qaraǵai» kýrorttaryn aspaly joldar men jaiaý baǵyttar jelisi arqyly biriktirý týristerdi bólýge, demalys úshin qolaily ári qaýipsiz orta qalyptastyrýǵa, sondai-aq Almatynyń halyqaralyq týristik ortalyq retindegi tartymdylyǵyn kúsheitýge múmkindik beredi.
Buǵan deiin habarlanǵandai, biylǵy jyldyń úsh toqsanynda Almatyǵa 563 myń sheteldik týrist kelgen. Bul ótken jyldyń osy kezeńimen salystyrǵanda 11% joǵary. Jyl sońyna deiin sheteldik týrister sany 750 myń adamǵa jetedi dep boljanyp otyr.
